Atyraýda Nazarbaev zııatkerlik mektebinde kún elektr stansasy iske qosyldy
«Nazarbaev Zııatkerlik mektepteri» derbes bilim berý uıymynyń basqarma tóraǵasy Kúlásh Shamshıdınovanyń aıtýynsha, kúnnen energııa alatyn elektr stansasy arqyly oqýshylardy balamaly energııa salasynda ǵylymı-zertteý jumystaryn júrgizýge baýlý kózdelgen.
«Budan úsh jyl buryn Astana ekonomıkalyq forýmy aıasynda «Shel» kompanııasymen «Kún energııasy – mektepterge» ilki jobasyn iske asyrý maqsatynda memorandýmǵa qol qoıylǵan edi. Atalǵan pılottyq joba «jasyl» ekonomıkaǵa birtindep kóshý, parnıktik gazdardy qysqartý, jańartylatyn energııa kózderin damytý syndy birneshe maqsatty iske asyrýdy kózdeıdi. Munyń qatarynda oqýshylardy naqty ǵylymdardy (STEM) zertteýge qyzyǵýshylyǵyn oıatyp, olardyń ekologııalyq mádenıtetin qalyptastyrý maqsaty da bar.
Qazir kún fotoelektr júıeleri Nur-Sultan, Aqtaý jáne Oral qalalaryndaǵy Nazarbaev zııatkerlik mektepterinde ornatyldy. Bıylǵy mamyrda Atyraýdaǵy bilim ordasynda kún panelderiniń qurylysy bastalǵan bolatyn. Bul stansa mekteptiń jyldyq energııa shyǵynyn 30 paıyzǵa únemdeýge múmkindik beredi» -deıdi Kúlásh Shamshıdınova.
Onyń aıtýynsha, bolashaqta kún elektr stansasymen mektep oqýshylary ǵylymı jobalar men zerthanalyq jumystardy júrgizetin bolady.
«Eń bastysy, shákirtterimiz mamandyq tańdaý, jumysqa ornalasý kezinde álemde ekologııa máselesiniń mańyzdy ekenin túsinetin bolady. Sondyqtan, mundaı ınnovatsııalyq jobalardyń birinshi kezekte mektepterde engizilýi úlken mańyzǵa ıe» - deıdi Kúlásh Shamshıdınova.
Endi mundaı kún elektr stansasynyń qurylysyn Túrkistan qalasyndaǵy Nazarbaev zııatkerlik mektebinde júrgizý josparlanǵan.
Eske sala ketelik, budan buryn atyraýlyq oqýshy volonterlerge arnalǵan mobıldik qosymsha jasap shyǵarǵanyn jazǵan edik.