Atyraýda Nazarbaev dańǵyly men Sátpaev atyndaǵy jańa yqshamaýdan bolady
ATYRAÝ. QazAqparat - Qanysh Sátpaev atyndaǵy ortalyq dańǵyl budan bylaı Nursultan Nazarbaevtyń esimin ıelenedi. Al akademık Q. Sátpaevtyń esimi 25 myń páterden turatyn jańa yqshamaýdanǵa beriledi, dep habarlaıdy Atyraý oblystyq óńirlik kommýnıkatsııalar qyzmeti.
Búgin Atyraý qalalyq máslıhatynyń depýtattary oblys ortalyǵyndaǵy basty dańǵyldyń ataýyn aýystyrý bastamasyn maquldady. Halyq qalaýlylary bul bastama Tuńǵysh Prezıdent - Ult kóshbasshysy Nursultan Ábishuly Nazarbaevtyń qol jetkizgen tabystaryn bolashaq urpaqtyń jadynda saqtaıtyn tarıhı qadam ekenin atap ótti.
Aıta ketý kerek, Q.Sátpaevtyń atyna Atyraý qalasy Talǵaırań aýyly aýmaǵynda boı kóteretin jańa yqshamaýdan beriledi. Qazir 1400 ga aýmaqqa 25 myń páterden turatyn 430 kópqabatty turǵyn úı qurylysyn júrgizý josparlanyp otyr. Sondaı-aq, munda áleýmettik nysandar - mektepter, aýrýhanalar, balabaqshalar, meshitter, kontsert zaldary, saıabaqtar pen ıppodromdar jáne taǵy basqa nysandar salynady.
Bıyl osy joba aıasynda 1800 páterlik 24 kópqabatty turǵyn úıdiń qurylysy bastalady degen jospar bar.
