Atyraýda Naýryz merekesi qarsańynda 300 oryndyq jańa mektep ashyldy

ATYRAÝ. QazAqparat - Atyraýdaǵy Erkinqala aýyldyq okrýginiń Rakýsha aýylynda jańa jalpy bilim beretin mekteptiń ashylý saltanaty ótti, dep habarlaıdy QazAqparat.

Búgin Rakýsha aýylynda 300 oryndyq jańa mektepti paıdalanýǵa berý saltanatty rásimi ótti. Bilim berý mekemesi «NCOC» kompanııasynyń demeýshiligimen salyndy.

«Rakýsha aýylyndaǵy M.Ótemisov orta mektebiniń qurylysy 2017 jyldyń maýsym aıynda bastalyp, 2019 jyldyń naýryzynda aıaqtaldy. Bul jergilikti turǵyndar úshin qýanyshty jaıt. Sebebi, «Órken» yqsham aýdanyndaǵy 35 mektepte aýyldyń 645 balasy oqyp jatyr», - dedi qalalyq bilim berý bóliminiń basshysynyń orynbasary Erlan Qabdınov.

Eki qabatty jańa mektep 2,5 gektar jerde ornalasqan. Munda sapaly bilim berýge barlyq qajetti jaǵdaı jasalǵan: barlyq kabınetter jańa zamanaýı jabdyqtarmen, ınteraktıvti taqtamen jáne kompıýtermen jabdyqtalǵan. Mektepte keń ári jaryq synyptar, úlken sport zaly, ashana, kitaphana jáne mektepke deıingi jastaǵy balalardyń jeke synyptary bar.

«Men bizdiń qalamyzdyń áleýmettik salasyn damytýǵa qosqan zor úlesi úshin «NCOC» kompanııasynyń basshylyǵyna alǵys aıtqym keledi. Oblys ortalyǵyndaǵy qurylys ınfraqurylymy men áleýmettik nysandaryńyzdyń arqasynda mektepter men balabaqshalar tapshylyǵy máselesi sheshilýde», - deıdi Atyraý qalasynyń ákimi Álımuhammed Quttymuratuly.