Atyraýda naýqastar temir kerýetke matrassyz jatýǵa májbúr bolǵan
ATYRAÝ. QazAqparat – Atyraýda júıke aýrýlary dıspanseriniń naýqastary temir kerýetke matrassyz uıyqtaýǵa májbúr bolǵan, dep habarlaıdy QazAqparat.
Bul jaıt «Atyraý – adaldyq alańy» jobalyq keńsesi júrgizgen monıtorıng barysynda belgili boldy.
«Monıtorıng QR Sybaılas jemqorlyqqa qarsy is-qımyl agenttigi Atyraý oblysy boıynsha departamentimen birge júrgizildi. Shara barysynda 1973 jyly salynǵan dıspanser ǵımaratynyń búgingi jaǵdaıy múshkil ekenine kóz jetkizdik. Ǵımarattyń edeni syqyrlap, esik-terezeleri tozǵan. Jıhazdar eskirgen, túnerip turǵan palatalarda naýqastar tyǵylysyp jatyr. Temekiniń ıisi sińgen palatalarda perde ustalmaǵan. Tipti naýqastar temir kerýetke matrassyz jatýǵa májbúr. Dıspanser basshylarynyń aıtýynsha, mundaǵy naýqastar tósek-oryn jabdyǵyn tez tozdyrady eken. Qujat boıynsha onyń merzimi - úsh aı» -deıdi «Atyraý –adaldyq alańy» jobalyq keńsesiniń jetekshisi Álfııa Ádıeva.
Qazir atalǵan dıspanserde 64 er men 55 áıel statsıonarlyq em qabyldap jatyr. Oǵan qosa, 14 adam depressııa jáne nevroz dıagnozymen emdelýde.
