Atyraýda naýqas balalarǵa qoldaý kórsetý maqsatynda qaıyrymdylyq kesh ótedi
ATYRAÝ. QazAqparat - Atyraýda alǵash ret qaıyrymdylyq baly ótedi, dep habarlaıdy QazAqparat tilshisi.
«1st Grand ball Atyrau» qaıyrymdylyq baly oblystyq jastar saıasaty máseleleri basqarmasynyń qoldaýymen uıymdastyrylady. Qaıyrymdylyq baldyń negizgi maqsaty - óńirdegi julyn jáne bas mıy zaqymdanǵan balalardy emdeý men saýyqtyrýmen aınalysatyn «Atyraý. Malenkaıa strana» qoryna qoldaý bildirý.
Aıtýly keshte elimizdiń jaryq juldyzdary óner kórsetip, arnaıy irikteýden ótken 150 debıýtant bı baǵdarlamalaryn usynatyn bolady. Atyraýlyq paralımpıadashy Erlan Qazıev ta osy keshtiń debıýtanttary qatarynda.
«Qaıyrymdylyq grand balyn alǵash ret Indonezııa memleketinde jarysta júrgenimde áleýmettik jeliden kórgen bolatynmyn. Atalmysh sharaǵa qatysýdaǵy basty maqsatym - qaıyrymdylyq jasaý, sondaı-aq, ózim sııaqty múmkindigi shekteýli jandardy ózgelerge qoldaý bildirip, qoǵamdyq ómirge belsene aralasýǵa shaqyrý. Bul keshte men de atyraýlyq jastardan qalyspaı bı bılep, ónerimdi kórsetemin. Barlyq jerlesterimdi qaıyrymdylyq keshine atsalysýǵa shaqyramyn», - deıdi Erlan Qazıev.
Aıta keteıik, Atyraýdaǵy alǵashqy Grand bal 7 qarashada «Saltanat Saraıy» meıramhanasynda ótedi. 18:30-da qonaqtar qyzyl kilemmen júrip ótip, 19:00-de qaıyrymdylyq is-sharasy bastalady.
