Atyraýda náresteler óliminiń artýy sebebi túsindirildi
ATYRAÝ. QazAqparat - 2017 jyly Atyraý oblysynda 69 jańa týǵan náreste ólimi tirkeldi, dep habarlaıdy «QazAqparat» HAA tilshisi.
«2016 jylǵy kórsetkishtermen salystyrǵanda, bıyl bizdiń oblysymyzdaǵy jas náresteler óliminiń kórsetkishi 2,6 paıyzǵa ósti. 1 qańtardan osy ýaqytqa deıingi aralyqta 69 jańa týǵan náreste qaıtys boldy. Buǵan qosa bir balanyń anasy da bar», - dep málimdedi óńirlik kommýnıkatsııalar qyzmetinde ótken brıfıngte Atyraý oblystyq densaýlyq saqtaý basqarmasynyń basshysy Mánshúk Aımurzıeva.
Dárigerlerdiń aıtýynsha, balalardyń merziminen buryn týýy, uryqtyń damýy barysynda túrli patologııalary bar júkti áıelderdiń tirkeýge kesh turýy jas náresteler óliminiń jıileýine sebep bolyp, dárigerlerdiń tıisti kómek kórsetýine múmkindik bolmaı otyr. Jyl sońyna deıin oblystyq densaýlyq saqtaý basqarmasy ana men bala óliminiń aldyn alý maqsatynda ótkiziletin sharalar josparyn qurdy.
