Atyraýda mýzykalyq sherýge 4 myńǵa jýyq bala qatysty
ATYRAÝ. QazAqparat - Atyraý kóshelerindegi jappaı mýzykalyq sherýge 4 myńǵa jýyq bala qatysty, dep habarlaıdy QazAqparat tilshisi.
Mýzykalyq orkestrler sherýi D.Nurpeıisova atyndaǵy akademııadan bastalyp, Isataı-Mahambet atyndaǵy ortalyq alańda aıaqtaldy. Bul jerde shara qonaqtaryna balalar men jastar shyǵarmashylyq ujymdarynyń teatrlandyrylǵan qoıylymdary kórsetildi.
Aýqymdy mádenı sharaǵa barabanshylardan, shyǵarmashylyq ansamblderden, cherlıderler, mýzykalyq jáne bı ujymdarynan quralǵan 43 top ásem kıimderimen, ónerlerimen jınalǵan jurtshylyqty tánti qyldy.
Cherlıdıng - bul gımnastıka, akrobatıkalyq turǵydaǵy sporttyq bı qımyldarynyń bir úlgisi. Ártúrli sporttyq oıyndarda qoldaýshylar retinde tanylǵan top bul joly da kópshilikti ásem qımyldarymen baýrap aldy.
Atyraý oblysy ákiminiń orynbasary Nursáýle Saılaýovanyń aıtýynsha, mýzykalyq orkestrler sherýi astananyń 20 jyldyq mereıtoıyna oraı uıymdastyryldy.
«Búginde balalar, oqýshylar men stýdentter úshin jarqyn bolashaqtyń esigi aıqara ashyq. Memleket jas urpaqty keshendi damytý úshin kóptegen múmkindikter berýde - balabaqshalar, mektepter salýda, jańa bedeldi bilim berý mekemeleri ashylýda. Úzdik stýdentter shet elderde oqý jáne tájirıbeden ótý múmkindigine ıe, elimizdiń joǵary oqý oryndarynda tegin bilim alýǵa granttar bólinedi. Biz sizderdiń arqalaryńyzda Qazaqstanymyzdyń bolashaǵy jarqyn bolaryna senimdimiz», - dedi shara qatysýshylaryna Nursáýle Saılaýova.
Sherýge qatysqan 4 myńǵa jýyq bala alańnan shyǵyp, D.Nurpeıisova atyndaǵy akademııadan Isataı-Mahambet atyndaǵy ortalyq alańǵa deıin jol júrdi. Keremet mýzykalyq repertýar, alýan túrli aspaptar, túrli ónerdi biriktirgen baǵdarlamalar, ujymnyń biryńǵaı kıimderi men teatrlandyrylǵan sherý aıryqsha áser qaldyryp, balalar merekesiniń kórkin ashty.
