Atyraýda muz jarylyp, traktor sýǵa batyp ketti
ATYRAÝ. QazAqparat – Atyraýda traktor Jaıyq ózeni taramdarynyń biri – balyq ótetin arnaǵa túsip qaldy, dep habarlaıdy QazAqparat.
Atyraý oblystyq TJD baspasóz qyzmetinen habarlaǵandaı, júk tıegish tehnıkanyń 49 jastaǵy júrgizýshisi aýylǵa baratyn joldy qysqartpaq bolyp, muzdyń ústimen ótken. Muz kólik aýyrlyǵyna shydamaı, tehnıka sýdyń astyna ketken. Traktor júrgizýshisi kabınadan shyǵyp úlgerip, zardap shekken joq.
«Tótenshe jaǵdaı ornyndaǵy arnanyń tereńdigi shamamen eki metr boldy. Muzdy jaǵaǵa deıin buzyp-jarýǵa týra kelgen, odan keıin TJD jasaǵynyń qutqarýshylary arnaǵa súńgýirlerdi jiberdi. Olar traktordyń sýǵa batqan bóligine arqan baılap, odan keıin kólikti jaǵaǵa súıretip shyǵardy», - dep baıandady aımaqtyq TJD-niń baspasóz qyzmetinen.
Avtory: Vıktor Sýtıagın
