Atyraýda muz oıylyp, Jaıyqqa túsip ketken eki adamnyń bireýi qutqaryldy
Oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa búgin, 5 qańtarda bolǵan.
Atyraý qalasynyń mańyndaǵy Jumysker aýylynan jergilikti ýaqytpen saǵat 11:14-te eki adamnyń Jaıyq ózeniniń muzy oıylyp, sýǵa túsip ketkeni týraly shaqyrtý túsken.
Oqıǵa ornyna jetken oblystyq polıtsııa departamenti balyq qoryna qylmystyq qol suǵýshylyqqa qarsy is-qımyl bóliminiń ınspektorlary, polıtsııa kapıtany Jetkinshek Imanǵalıev pen polıtsııa aǵa serjanty Aıbat Jaýymbaev jedel jetken.
Olar ózenge batyp ketkeli turǵan bir adamdy arqanmen ustap qalǵan.
«Jedel-qutqarý jasaǵynyń qutqarýshylary men polıtsııa qyzmetkerleri Jaıyq ózenine túsip ketken 1974 jylǵy er adamdy qutqaryp qaldy. Qutqarylǵan er adam oblystyq aýrýhanaǵa jetkizildi», -dep habarlady departamenttiń qoǵammen baılanys toby.
Qazir Jaıyq ózenine túsip ketken 1975 jylǵy er adamdy sý astynan izdestirý jalǵasyp jatyr.
Avarııalyq-qutqarý jumystaryna Atyraý oblystyq tótenshe jaǵdaılar departamentinen 8 qutqarýshy, 2 tehnıka men 1 qaıyq tartylǵan.
Eske sala ketelik, buǵan deıin Atyraýda 8 jasar bala Jaıyq ózenine batqan jasóspirimderdi qutqarýǵa kómekteskenin jazǵan edik.
Budan soń dostaryn sýdan qutqarǵan atyraýlyq oqýshy «Jas batyr» atandy.
Foto: Atyraý oblystyq TJD
