Atyraýda Munaıshy stadıonynyń fýtbol alańy jańartylýda

Jóndeý jumystary demeýshilerdiń kómegimen júzege asyrlýda, dep habarlaıdy QazAqparat óńirlik kommýnıkatsııalar qyzmetine silteme jasap.

QR fýtbol federatsııasynyń sertıfıkattaý komıtetiniń 2019 jylǵy 14 aqpandaǵy sheshimi boıynsha sertıfıkattaý komıssııasynyń saraptama qorytyndysy shyqqanǵa deıin «Atyraý» FK-nyń alańy oıyn ótkizýge jaramsyz bolyp tabylady.

Atalǵan jaǵdaıdy qalypqa keltirý maqsatynda «Atyraý» kásipqoı sport klýby» qoǵamdyq qory eki aı boıy demeýshilerge usynys jasady. «GAZ story montazh KZ» JShS-i usynysty qabyl alyp, alańdy qaıta jańǵyrtý jumystaryn bastady.

«2019 jyldyń 28 naýryzynda «Munaıshy» fýtbol stadıonyna jasandy alań tóseý jumystaryn bastadyq. Jumystarǵa qajetti barlyq tehnıka jumyldyryldy. Qazirgi tańda qazý jumystary jasalýda. Aldymen joǵarǵy qabatyn, odan keıin qum jáne qıyrshyq tas tóseımiz. Sodan soń jasandy alańǵa qajetti materıaldardy ákelip, daıyndaımyz»,-deıdi ınjener-qurylysshy Rahman Haıtqulov.

Burynǵy tiri shóp gazondary paıdaǵa aspaýyna baılanysty, demeýshlier kómegimen jasandy alań salynýda. Jańa alań FIFA-nyń barlyq talaptaryna sáıkes keledi. Jóndeý jumystary bitken soń fýtbolshylardyń ıgiligine jaramaq.

Qazirgi tańda «Atyraý» fýtbol klýby óz alańyndaǵy kezekti oıyndaryn Nur-Sultan qalasyndaǵy «Astana-Arena» alańynda ótkizýge májbúr. Shuǵyl jáne sapaly túrde jumystar aıaqtalǵan boıda jergilikti komanda óz alańynda oıyndaryn jalǵastyratyn bolady.

Injener-qurylysshy Rahman Haıtqulov bastaǵan komanda jumysy álem boıynsha joǵary baǵalanyp keledi. Onyń ishinde Sankt-Peterbýrgtegi «Zenıt-Arena» jáne Almaty-Arena sport keshenin erekshe aıtýǵa bolady.