Atyraýda munaıqubyrshylardyń «Úzdik maman - 2019» halyqaralyq baıqaýy bastaldy
«QazTransOıl» AQ uıymdastyrýymen ótip jatqan sharada Halyqaralyq munaı tasymaly qaýymdastyǵyna múshe kompanııalardyń mamandary baq synaıdy. Atap aıtsaq, qazaqstandyq «QazTransOıl» AQ, reseılik «Transneft», belarýstyq «Gomeltransneft Drýjba», ýkraınalyq «Ýkrtransnafta», slovakııalyq «Transpetrol», vengrlik MOL jáne qytaılyq CNPC – iri munaı tasymaldaý kompanııalary.
Kásibı mamandardyń saıysynda 44 qyzmetker úsh kún boıy «Úzdik elektrgazben dánekerleýshi», «Úzdik taýar operatory», «Úzdik hımııalyq saraptaý zerthanashysy», «Úzdik tehnologııalyq qurylǵylardy jóndeý slesari», «Úzdik baqylaý-ólsheý quraldary jáne jáne avtomatıka slesari», «Úzdik elektr jabdyqtaryn jóndeý jáne qyzmet kórsetý elektromonteri», «Úzdik munaı aıdaý stansasynyń operatory» syndy segiz atalym boıynsha jarysqa túsedi.
Saltanatty sharany ashqan Atyraý oblysynyń ákimi Nurlan Noǵaev munaı-gaz salasynda munaıqubyrshylardyń eńbegi erekshe ekenin atap ótti.
«Atyraý – Qazaqstannyń munaıly astanasy. Elimizde shyǵarylatyn qara altynnyń shamamen elý paıyzy osy óńirge tıesili. Bul rette, ekologııalyq turǵydan qaýipsiz, ekonomıkalyq jaǵynan tıimdi munaı tasymaly salasy elimizdiń damýyna zor úlesin qosýda», - dedi óńir basshysy.
Al «QazTransOıl» AQ bas dırektorynyń orynbasary Sábıt Arynovtyń aıtýynsha, baıqaýdyń basty maqsaty jumysshy mamandyǵynyń mártebesin kóterip, qyzmetkerlerdiń biliktiligin arttyrý. «Bıylǵy saıys Qazaqstan munaıynyń 120 jyldyq mereıtoıymen sáıkes kelip otyr. Baıqaý Halyqaralyq munaı tasymaly qaýymdastyǵyna múshe kompanııalardyń kásibı turǵydan birigip, tájirıbe almasýyna múmkindik beredi», - dedi.
Sharada Halyqaralyq munaı tasymaly qaýymdastyǵyna múshe kompanııa ókilderi munaı qubyry salasyndaǵy jańa tehnologııalar týraly jazylǵan 8 joldaýy bar fýtýrologııalyq kapsýlasyn «Dostyq» stelasyna saldy. Bolashaq tolqynǵa arnalǵan joldaý 2023 jyly qaýymdastyqtyń 10 jyldyǵynda ashylatyn bolady.
Aıta keteıik, alǵashqy ret munaı qubyry salasyndaǵy jumysshylar arasyndaǵy halyqaralyq «Úzdik maman» baıqaýy 2003 jyly Reseıdiń Samara qalasynda ótti. Qazaqstanda bul baıqaý 2004 jáne 2007 jyldary Aqtaý qalasynda, al 2012 jyly Pavlodarda ótti.
«QazTransOıl» AQ – QR magıstraldyq munaı qubyry boıynsha ulttyq operatory. Búginde onyń óndiristik nysandary Shymkent, Qaraǵandy, Pavlodar, Túrkistan, Soltústik Qazaqstan, Atyraý, Mańǵystaý, Batys Qazaqstan, Qyzylorda, Almaty, Aqtóbe, Shyǵys Qazaqstan oblystarynda ornalasqan.
