Atyraýda munaı tógilgen ken ornynyń topyraǵy tekserilip jatyr

ASTANA. QazAqparat - Atyraý oblysynyń ekologııa departamenti munaı tógilgen ken ornynyń topyraǵyn tekserýdi bastady. Jylyoı aýdanynda 23-shi aqpan kúni, «Morskoe» munaı ken ornynda, № 502 munaı uńǵymasynda munaı tógilý oryn alǵan, dep habarlaıdy QazAqparat Atyraý oblysynyń óńirlik kommýnıkatsııalar qyzmetine silteme jasap.

750 sharshy metr aýmaqqa munaı tógilgen. Munaı tek burǵylaý qondyrǵysynyń aýmaǵyna ǵana tógilgen. Qazirgi ýaqytta aýmaq, tógilgen munaı qaldyqtarynan tazalandy, munaı qaldyqtaryn Mańǵystaý oblysyndaǵy munaı qaldyǵyn qabyldaıtyn arnaıy polıgonǵa jóneltý jumystary júrgizilýde.

Atyraý oblysy ekologııa departamenti mamandary topyraqtyń lastaný dárejesin anyqtaý úshin jáne qorshaǵan ortaǵa keltirilgen zalaldyń deńgeıin anyqtaý úshin topyraq synamasyn aldy.
«Tógilgen munaı saldaryn baǵalaý úshin, biz birqatar qajetti rásimderdi ótkizdik»,- dep habarlaıdy Atyraý oblysy ekologııa departamentiniń memlekettik ekologııalyq baqylaý bólimi basshysy Abzal Temirov.- Saraptama nátejıeleri belgili bolǵannan keıin qorshaǵan ortaǵa keltirilgen zalal deńgeıi baǵalanady. Sondaı aq, munaı tógilý oqıǵasyn ýaqytyly habarlamaǵany úshin, jer qoınaýyn paıdalanýshyǵa qatysty sharalar qabyldanady».
Jylyoı aýdanynyń ákimi Álımuhammed Quttymuratulynyń habarlaýynsha atalǵan aýmaqta oqıǵanyń sebepterin anyqtap, munaı tógilý saldaryn joıý maqsatynda, ekologııa departamentinen bólek, barlyq jaýapty organdardyń ókili jumys atqarýda. Jaǵdaı jergilikti atqarýshy organdardyń baqylaýynda.