Atyraýda munaı ónimderin urlaýmen aınalysyp kelgen qylmystyq top quryqtaldy
ATYRAÝ. QazAqparat - Atyraýda Teńiz munaı-gaz kesheni nysandaryndaǵy janar-jaǵarmaı materıaldarynyń júıeli urlanýyna kúdikti uıymdasqan qylmystyq toptyń músheleri qamaýǵa alyndy, dep habarlady «QazAqparat» HAA tilshisi.
«Qylmystyq top músheleri munaı jáne munaı ónimderin tasymaldaý, satyp alý, taratý, saqtaý, sondaı-aq munaıdy olardyń alynǵan jerin zańdy túrde rastaıtyn qujattarsyz óńdeý boıynsha aıyptalýda. Osy fakti boıynsha QR QK 197-baby, 3-bóligine sáıkes qylmystyq is qozǵaldy. Uıymdasqan toptyń eki múshesi qamaýǵa alyndy. Tergeý jalǵasýda», - deıdi №2 qalalyq sottyń baspasóz qyzmetindegiler.
Eske sala keteıik, 6 qyrkúıekte Atyraý oblysy prokýratýrasynyń úılestirýimen UQQD, ІІD jáne MKD qyzmetkerlerinen quralǵan jedel-tergeý toby Teńiz keni nysandarynan janar-jaǵarmaı materıaldaryn urlaǵan uıymdasqan qylmystyq toptyń joly kesilgen bolatyn. Keıin alynǵan munaı ónimderi saýdalanatyn bolǵan.
Qylmystyq top múshelerinen jalpy kólemi 200 tonna bolatyn dızel janarmaıynyń ydystary tabylǵan, olardyń janar-jaǵarmaı materıaldaryn satyp alý boıynsha zańsyz qyzmetke qatysy baryn dáleldeıtin qujattyq jáne basqa materıaldar alynǵan. Oblystyq prokýratýranyń málimetteri boıynsha, osy qylmystyq iske barlyǵy 11 adam kúdikti bolyp otyr.
