Atyraýda munaı ónimderin óndirý jáne jol bıtýmy máseleleri talqylandy
«Kúni keshe Memleket basshysy Qazaqstan halqyna Joldaýynda jol-qurylys jumystary maýsymynda ishki naryqta bıtým tapshylyǵyna qatysty ádil syn aıtty. Seriktestermen jáne múddeli memlekettik organdarmen birlesip, qalyptasqan jaǵdaıdy ózgertý boıynsha túbegeıli sharalar qabyldaý qajet», - dep atap ótti M. Myrzaǵalıev.
Mamandardyń aıtýynsha, Qazaqstanda bıtýmǵa degen suranys jaz aılarynda, jol qurylysy belsendi júrgiziletin shaqta arta túsedi. Osyǵan baılanysty Maǵzum Myrzaǵalıev «QazMunaıGazdyń» jaýapty qurylymdyq bólimshelerine jol-qurylys uıymdaryn memleket tarapynan jyl boıy qarjylandyrý (avans berý) múmkindigin qarastyrýdy tapsyrdy. Sonymen qatar, ulttyq kompanııa mamandaryna ýákiletti memlekettik organdarmen birlesip jumys isteý júkteldi. Bul jol-qurylys jumystary maýsymynyń bastalýyna qaraı ishki naryqta bıtýmnyń qajetti qoryn jınaqtaýǵa múmkindik beredi.
Jıynda Caspi Bitum zaýytynyń qýatyn 1,5 ese arttyrý máselesi talqylandy. Bul joǵary sapaly bıtým óndirisin jylyna 750 myń tonnaǵa deıin ulǵaıtýǵa jol ashady. Caspi Bitum keltirgen derek boıynsha, munaı óńdeý kólemin arttyrýǵa múmkindik bar, qazir munyń tehnıkalyq-ekonomıkalyq negizdemesi ázirlenip qoıǵan, mamandar jobalaýǵa kirisip jatyr.
Sondaı-aq, jıyn barysynda Atyraý munaı óńdeý zaýytynyń basshylyǵy kásiporynnyń turaqty jumys istep turǵanyn, óndiristik kórsetkishter ýaqtyly oryndalyp jatqanyn baıandady. Bıylǵy jyldyń qorytyndysyna sáıkes, zaýytta munaı óńdeý kólemi 5 mln tonnadan asady. Janar-jaǵarmaı naryǵyndaǵy jaǵdaıdy turaqtandyrý úshin Atyraý munaı óńdeý zaýytynyń qyrkúıekke josparlanǵan jóndeý jumysyn keıinge aýystyrý máselesi pysyqtalýda. Bul rette M. Myrzaǵalıev zaýyt basshylyǵyna janar-jaǵarmaı naryǵyndaǵy qazirgi jaǵdaıdy eskere otyryp, zaýyttyń aǵymdaǵy jóndeý jumysyn keıinge aýystyrýdy tapsyrdy.
