Atyraýda munaı qory 86,2 mıllıon tonnaǵa jetti
«Embimunaıgaz» AQ baspasóz qyzmetiniń habarlaýynsha, ken oryndarynda qosymsha barlaý esebinen kómirsýtegi shıkizatynyń qory eselendi. Bul Memleket basshysy Qasym-Jomart Toqaevtyń geologııalyq barlaý jumystaryn kúsheıtýge qatysty tapsyrmasyna sáıkes qolǵa alynǵan bolatyn. Qazir «Embimunaıgaz» ıeligindegi ken oryndarynan óndiriletin munaı qory 86,2 mıllıon tonnaǵa jetti. Al, ótken jyly mundaǵy qor kólemi 74,3 mıllıon tonnany quraǵan edi.
«Byltyr QR Paıdaly qazbalar korlary jónindegi memlekettik komıssııasy qoldanystaǵy S.Nurjanov, Kenbaı (Shyǵys Moldabek ýchaskesi), J.Dosmuhambetov, Botaqan, sondaı-aq qaıta ashylǵan Batys Qarasor (1,4 mln tn) ken oryndarynda 14,8 mln tonna kólemindegi kómirsýtegi shıkizaty qoryn balansqa alyp, bekitti. Qor ósimine baıyrǵy ken oryndaryn ıgerýge jańa ádister men tehnologııalardy qoldana otyryp, belsendi barlaý jumystaryn júrgizý nátıjesinde qol jetti», - dep habarlady «Embimunaıgaz» AQ-nyń baspasóz qyzmeti.
Sondaı-aq, byltyr Taısoıǵan blogynyń 5 600 sharshy shaqyrym aýmaǵyna 3D MOGT seısmobarlaý júrgizilgen. Endi seısmobarlaý derekterin óńdeý arqyly barlaý, burǵylaý jumystary júrgiziletin qurylymdardy daıyndaý kózdelip otyr.
