Atyraýda munaı-gaz salasyndaǵy kadrlardy daıyndaý men qaıta daıyndaýǵa arnalǵan 700 oryndyq aımaqaralyq ortalyqtyń qurylysy aıaqtalýǵa taıaý - J.Túımebaev
ASTANA. Aqpannyń 24-i. QazAqparat /Aıdar Ospanalıev/ - 2007-2009 jyldar aralyǵynda kásiptik-tehnıkalyq bilim berý baǵytyndaǵy oqý oryndary 34-ke kóbeıip, 882-ni qurady.
Olardyń 513-i - memlekettik, 369-y - jekemenshik oqý oryndary. Bul málimetterdi búgin eldegi kásiptik-tehnıkalyq bilim berýge baılanysty Astanadaǵy Polıtehnıkalyq kolledjde ótken kóshpeli jıynda Bilim jáne ǵylym mınıstri Janseıit Túımebaev keltirdi, dep habarlaıdy QazAqparat.
Mınıstrdiń derekterine qaraǵanda, respýblıkada 2008-2009 jyldar aralyǵynda respýblıkalyq bıýdjet esebinen Qaraǵandy oblysynyń Qarqaraly qalasynda 360 oryndyq kásiptik lıtseı salynǵan. Sondaı-aq 420 oryndyq osyndaı lıtseı «Teńizshevroıl» JShS-nyń esebinen Atyraý oblysynyń Qulsary qalasynda paıdalanýǵa berilgen. Al elordamyzda «Qazaqmys» JShS-niń esebinen jetim balalarǵa arnalǵan 300 oryndyq kásiptik lıtseı boı kóterdi. «Qazirgi tańda respýblıkalyq bıýdjet esebinen Astanada - 800 oryndyq, al Ońtústik Qazaqstan oblysynyń Shaıan aýdanynda 360 oryndyq kásiptik lıtseılerdiń qurylysy júrip jatyr. Sondaı-aq Ekibastuzda 700 oryndyq otyn-energetıka salasyndaǵy kadrlardy daıyndaýǵa arnalǵan aımaqaralyq ortalyqtyń qurylysy jalǵasýda. Osy ýaqytta Atyraýda munaı-gaz salasyndaǵy kadrlardy daıyndaý men qaıta daıyndaýǵa arnalǵan 700 oryndyq aımaqaralyq ortalyqtyń qurylysy aıaqtalýǵa taıaý», dedi mınıstr.
