Atyraýda múmkindigi shekteýli 14 797 adam tehnıkalyq ońaltý quralymen qamtyldy
ATYRAÝ. QazAqparat – Atyraý oblysynda múmkindigi shekteýli 14 797 adam tehnıkalyq ońaltý quralymen qamtyldy, dep habarlaıdy QazAqparat.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetinshe, barlyq sanatta múmkindigi shekteýli 23 319 adam bar.
«Onyń ishinde I topta – 1 961, II topta – 9 392, al 8 160 adam III top múgedektigin alǵan. Al, múmkindigi shekteýli balalar sany – 3 806. Oblysta múmkindigi shekteýli adamdarǵa arnaýly áleýmettik qyzmetter kórsetetin eki mekeme bar. Biri – oblystyq múgedekterdi saýyqtyrý ortalyǵy, ekinshisi – №3 arnaýly áleýmettik qyzmetter kórsetý ortalyǵy. Bul mekemelerde 1 381 adam áleýmettik qyzmet alady», - deıdi Azamat Mámbetov.
Onyń aıtýynsha, byltyr 16 434 múmkindigi shekteýli adam tehnıkalyq ońaltý quraldarymen qamtamasyz etýge ótinish bergen. «Áleýmettik qyzmetter» portaly arqyly ótinishi berýshilerdiń 90 paıyzy, nemese 14 797 adam qajetti quraldarmen jáne áleýmettik qyzmettermen qamtamasyz etilgen.
Eske sala ketelik, budan buryn Atyraý oblysynda bala kezinde kóship kelgen qandasymyz el azamattyǵyn alǵanyn jazǵan edik.
