Atyraýda Muhtar Shahanovtyń jyr keshi ótti
Mahambet atyndaǵy oblystyq akademııalyq qazaq drama teatrynda Muhtar Shahanovtyń 80 jasqa tolý mereıtoıyna oraı «Ǵasyrdyń ǵalamat aqyny» atty poezııa keshi ótti.
Muhtar Shahanovtyń aldaspan aqyn Mahambet rýhyna, kósile aqqan Jaıyq ózenine ińkárligi týyndylarynan anyq ańǵarylady. Sol sebepten shyǵarmashylyq kesh aqynnyń shoqtyǵy bıik jyrlarynan quralǵan «Sálem, uly Jaıyǵym!» atty teatrlandyrylǵan prologpen ashyldy. Budan soń oblys ákimi Serik Shápkenov mereıtoı ıesin quttyqtap, berekeli ǵumyr men shyǵarmashylyq shabyt tiledi.
«Biz búgin jyrlaryn qazaq halqy jatqa biletin aqyn, Jeltoqsan jylnamasynan roman-epopeıa jazǵan jazýshy, ánderin barsha jurt shyrqaǵan kompozıtor, qazaq tiliniń qamy úshin shybyn janyn shúberekke túıip kúresken qaıratker Muhtar Shahanovpen kezdesip otyrmyz. Muhıtqa quıatyn ózen sekildi tabıǵat syıǵa bergen bar talantyn, azamattyq asyl qasıetin joǵary baǵalap, Memleket basshysy Qasym-Jomart Toqaev Ulytaýda ótken Ulttyq quryltaıdyń alǵashqy otyrysynda «Bul kisi óte adal, shynshyl, ultjandy adam. Men Muhtar Shahanovqa Qazaqstannyń Eńbek eri ataǵyn berý týraly Jarlyqqa qol qoıdym» dep joǵary baǵa berdi. Budan artyq qandaı baǵa berýge bolady. Jyr súıgen, sóz qadirlegen Atyraý jurtshylyǵynyń atynan bıigińizben súısindirip, tereńdigińizben oılandyryp, ortamyzda árdáıim aman júrýińizge tilekshimin», - dedi Serik Shápkenov.
Ózz kezeginde qazaq poezııasynyń tanymal ókili, aqyn Muhtar Shahanov jibekke tizgen laǵyl monshaqtaı aq batysyn berip, Atyraý jurtshylyǵyna alǵys bildirdi.
Jyr keshinde aqynnyń sózine jazylǵan ánder shyrqalyp, óleńderi oqyldy.
