Atyraýda múgedektigi bar adamdardy ońaltýǵa arnalǵan 150 oryndyq ortalyq salynady

ATYRAÝ. QazAqparat – Bıyl Atyraýda múmkindigi shekteýli jandarǵa arnalǵan 150 oryndyq ońaltý ortalyǵynyń qurylysy bastalady, dep habarlaıdy QazAqparat tilshisi. Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, jańa ortalyqtyń aýmaǵy 12 myń sharshy metrden asady.

«Úsh qabatty ǵımarat barlyq zamanaýı talapqa saı bolady. Medıtsınalyq nysanda turǵyndardyń túrli toby úshin keń aýqymdy qyzmet kórsetiledi. Mundaı ońaltý ortalyqtaryn salý shalǵaı eldi mekenderdegi turǵyndardyń sapaly arnaýly áleýmettik qyzmetterdi alýyna jaǵdaı jasaıdy. Jańa ortalyqta jylyna 1500-den asa adam em qabyldaı alady», - dep habarlady Azamat Mámbetov.

Oblystyq qurylys basqarmasynyń málimetinshe, ortalyqtyń jobalaý-smetalyq qujattamasy tolyq jasaqtalǵan. Osy jobaǵa sáıkes, munda saýyqtyrý-júzý basseıni, sport jáne májilis zaldary, tehnıkalyq ǵımarat pen jylyjaı qarastyrylǵan.

Ǵımarattyń birinshi qabatynda dárigerlik bólmeler men ońaltý-jattyǵý zaly, ÝZI kabıneti jáne dárihana ornalasady. Sondaı-aq, jobaǵa sáıkes ortalyqta 125 oryndyq ashana bolady.

Al ekinshi qabatynda naýqastardy ońaltýǵa arnalǵan úsh aýmaq josparlanǵan. Bul – medıtsınalyq, áleýmettik jáne psıhologııalyq ońaltý aýmaǵy. Úshinshi qabatta tuz shahtasy, elektr sáýlesimen emdeý, ıngalıator aýmaǵy, fızıologııalyq jáne mehanıkalyq emdeý, sýmen jáne ınemen emdeý sekildi terapııalyq bólmeler bar.

Qazir ońaltý ortalyǵynyń qurylysyn júrgizetin merdigerdi anyqtaýǵa memlekettik satyp alý konkýrsy jarııalanǵan.

Eske sala keteıik, budan buryn Atyraýda múgedektigi bar adamdar úshin 150 oryndyq ońaltý ortalyǵy salynatynyn jazǵan bolatynbyz.