Atyraýda múgedek balalarǵa qatysty vıdeoǵa túsinik berildi
Oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Alfııa Tóleǵarıevanyń aıtýynsha, bul vıdeony bıylǵy jyldyń 8 sáýirinde sharýashylyq bıkesi túsirgen.
«Basqarma basshylyǵy atalǵan vıdeoǵa baılanysty №3 oblystyq arnaýly áleýmettik qyzmet kórsetý ortalyǵynyń qyzmetkerlerimen jıyn ótkizip, túsinik jumystaryn júrgizdi. Tıisti baqylaý júrgizbegen ortalyq dırektoryna «qatań sógis» berilip, tártiptik jaza qoldanyldy», - dedi Alfııa Tóleǵarıeva.
Maýsym aıynda oblystyq prokýratýra ortalyqtaǵy balalardyń quqyqtaryn qorǵaý zańdylyǵyna keshendi tekserý júrgizgen. Oblys ákiminiń birinshi orynbasary men ÚEU ókilderi ortalyqtaǵy qyzmet kórsetý barysymen tanysqan.
Sondaı-aq, oblys ákiminiń orynbasary men kámeletke tolmaǵan balalardyń quqyǵyn qorǵaý jónindegi komıssııa prokýratýra, depýtattar, memlekettik organdar ókilderiniń qatysýymen kóshpeli otyrys ótkizgen. Komıssııa músheleri ortalyqty aralap, balalardyń jaǵdaıymen, tamaqtaný jaıymen jiti tanysqan.
Alfııa Tóleǵarıevanyń aıtýynsha, ortalyqta múlik urlyǵy oryn alyp, oǵan sharýashylyq bıkesiniń qatysy bary anyqtalǵan.
«Qoldanystaǵy zańnamaǵa sáıkes, sharýashylyq bıkesi istiń mán-jaıy anyqtalǵanǵa deıin qyzmetten ýaqytsha shettetildi. Qazir ol ortalyqtyń qyzmetkeri emes. Ortalyq ujymy onyń ústinen oblys prokýrorynyń atyna ujymdyq aryz jazdy. Aryzda onyń qyzmettik etıkany saqtamaýy, urlyqqa barǵany, jala jabý men basqa da zańbuzýshylyqtar týraly aıtylǵan. Qazir Atyraý qalalyq polıtsııa basqarmasy taralǵan beınejazbaǵa qatysty tekserý júrgizýde», - deıdi Alfııa Tóleǵarıeva.
