Atyraýda muǵalimder koronavırýsqa qarsy vaktsına ala bastady
ATYRAÝ. QazAqparat – Búgin Atyraýda muǵalimder koronavırýsqa qarsy vaktsına ala bastady, dep habarlaıdy QazAqparat.
«Spýtnık V» vaktsınasyn alǵashqylardyń qatarynda oblystyq bilim berý basqarmasy basshysynyń orynbasary Aınagúl Dúısekenova, Atyraý qalasyndaǵy №16 Qarajigitov atyndaǵy orta mekteptiń dırektory Almabek Abdolov, № 20 Pýshkın atyndaǵy orta mektep-lıtseıiniń dırektory Gúlnar Qojahmetova, Atyraý qalalyq bilim bólimi basshysynyń orynbasary Qaırat Qýanyshev pen IT mektep-lıtseıi dırektorynyń orynbasary Aıgúl Seıitova saldyrdy.
«Kez-kelgen indetten qorǵanýdyń, aldyn alýdyń bir joly – vaktsına. Buǵan deıin oblystyq densaýlyq saqtaý basqarmasy men emhanalardyń dárigerleri koronavırýs ınfektsııasyna qarsy ekpeniń paıdasy, onyń áseri týraly aqparattar berdi. Mundaı vaktsına qaýipti vırýstan qorǵaıdy. Ekpe alǵan soń qorqynyshsyz júrýge bolady. Ózimniń saýlyǵym, jaqyndarymnyń amandyǵy úshin vaktsına aldym» - deıdi oblystyq bilim berý basqarmasy basshysynyń orynbasary Aınagúl Dúısekenova.
Qazir Atyraý oblysynyń bilim berý salasynda 11 myńnan astam adam jumys isteıdi. Solardyń qataryndaǵy №16 Qarajigitov atyndaǵy orta mekteptiń dırektory Almabek Abdolov vaktsına saldyrýdan qorqytýdyń qajeti joǵyna toqtaldy.
«Muǵalimder eldiń keleshektegi órkendeýine úles qosatyn jas býyn ókilderimen tyǵyz baılanys jasaıdy. Sol sebepten, «Spýtnık V» vaktsınasyn erikti túrde saldyrýǵa bekindim. Óıtkeni, birinshiden, ózimniń de, jauyndarymnyń da saýlyǵyn oıladym. Ekinshiden, mektep oqýshylaryna qaýipti vırýsty tasymaldaýshy bolǵym kelmedi. Al, vaktsına saldyrǵannan keıin janama áserin baıqamadym» -deıdi Almabek Abdolov.
Eske sala ketelik, budan buryn Atyraýǵa koronavırýsqa qarsy vaktsınanyń taǵy 5 600 dozasy jetkiziletinin jazǵan edik.
