Atyraýda muǵalimder biliktilikterin arttyrdy

ATYRAÝ. QazAqparat - Atyraýda muǵalimderdiń tsıfrlyq saýattylyǵy joǵarylaýda. Muǵalimderdi oqytý semınary «Tsıfrlyq Qazaqstan» baǵdarlamasy aıasynda ótýde, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.

Oqý semınarlary H.Dosmuhamedov atyndaǵy Atyraý memlekettik ýnıversıtetiniń kitaphanasynda uıymdastyryldy.

«Trenıng tórt deńgeıde ótedi. Birinshisi kompıýterlik jáne mobıldi gadjetterdi paıdalaný daǵdylaryn qamtıdy, ekinshisi tranzaktsııalyq daǵdylardy, sondaı-aq, «elektrondyq jáne ashyq úkimet» qyzmetterin paıdalaný, qyzmetterdi alý jáne tóleý, úshinshi deńgeı ǵalamtorda taýarlardy jáne qyzmetterdi satyp alýǵa, satýǵa jáne taratýǵa baılanysty, tórtinshi - tsıfrlyq qurylǵylardy paıdalaný daǵdysy»,- deıdi Atyraý oblysy ákim apparatynyń aqparattyq tehnologııalar bólimi meńgerýshisi mindetin atqarýshy Nurlybek Daýylbaev.

Eki kúndik semınarlarǵa qaladan emes, aýdandardan da kelgen muǵalimder qatysýda. Qazirgi kezde 87 muǵalim tsıfrlyq saýattylyǵyn arttyrdy.

«Muǵalim únemi óz-ózin damytyp otyrýy kerek. Mundaı semınarlar ýaqyt aǵymynan qalmaýǵa múmkindik beredi», - dedi Qurmanǵazy aýdanynan kelgen ınformatıka pániniń muǵalimi Nurbolat Ýtekov.