Atyraýda monopolıst kásiporyn 99 kásipkerge 739 mln teńge qaryz bolǵan
Sybaılas jemqorlyqqa qarsy is-qımyl agenttigi Atyraý oblystyq departamentiniń basshysy Erulan Serikqalıevtyń aıtýynsha, kásipkerlerden 25-ke jýyq shaǵym túsken.
«Bıyl Memleket basshysynyń tapsyrmasyna sáıkes kásipkerlerdiń quqyǵyn qorǵaý úshin «Bızneske jol» jobasy iske qosyldy. Jyl basynan beri 250 kásipkerden 25-ke jýyq ótinish tústi. Shaǵymǵa baılanysty qabyldanǵan sharalardyń nátıjesinde sybaılas jemqorlyq derekteri joıylyp, 180-ge jýyq kásipkerdiń quqyǵy qalpyna keltirildi. Departamenttiń usynysymen 2 laýazymdy tulǵa tártiptik jaýapkershilikke tartyldy», - dep habarlady Erulan Serikqalıev.
Onyń deregine súıensek, «Atyraý oblysy Sý Arnasy» KMK-nyń 99 kásipkerlik sýbektisine 739 mln qaryz ekeni anyqtalǵan. Bul – kórsetilgen qyzmetter men taýarlardy jetkizgeni úshin tólenbegen qarjy.
«Osyǵan baılanysty departament pen ákimdik tıisti sharalar qabyldady. Sonyń nátıjesinde 49 kásipkerlik sýbektisine 587 mln teńge tólendi. Osylaısha, 49 kásipkerlik sýbektisiniń quqyǵy qorǵaldy», - dep málim etti Erulan Serikqalıev.
Kedergige tap bolǵan kásipkerlerden kún saıyn shaǵym túsken. Sol sebepten, kásipkerler úshin jadnamalar ázirlengen.
«Máselen, 43 kásipker «Agrarlyq kredıttik korporatsııa» AQ-nyń Atyraý oblystyq fılıalyna, «Qurmanǵazy», «Isataı» kredıttik seriktestikterine bereshegin tolyǵymen ótegen. Alaıda, kásipkerlik sýbektilerine tıesili, kepildegi múlikke quqyq belgileıtin qujattary qaıtarylmaǵan. Qujattardy qaıtarýdan bas tartýdyń sebebi – fılıal men seriktestikterge 12 josyqsyz kásipkerlik sýbektisiniń ortaq jaýapkershilikke baılanysty bereshegi. Departament qyzmetkerleriniń aralasýynan keıin fılıal basshylyǵy oń sheshim qabyldady. Kásipkerlerge quqyq belgileıtin qujattardy qaıtarý júrgizilip jatyr», - dedi Erulan Serikqalıev.
Eske sala ketelik, budan buryn Atyraý oblysynda kedergige tap bolǵan kásipkerler Antıkorǵa shaǵymdanǵanyn habarlaǵan bolatynbyz.
