Atyraýda monopolıst aýyz sý tarıfin 100 paıyzǵa kóterýdi surap otyr
«Atyraý oblysy sý arnasy» – munaıly shahar turǵyndaryn aýyz sýmen qamtamasyz etýdi júzege asyratyn jalǵyz kommýnaldyq memlekettik kásiporyn.
Qazir tutynýshylarǵa jetkiziletin aýyz sýdyń tarıfi - bir tekshe metr úshin 64 teńge.
Sýdy Jaıyq ózeninen alatyn kásiporyn endi tarıfti 100 paıyzǵa kóterýdi kózdep otyr.
Sol sebepten, Tabıǵı monopolııalardy retteý komıtetiniń Atyraý oblysy boıynsha departamentine ótinim berdi.
Ótinimde aldaǵy 5 jylǵa arnalǵan sý tarıfin kóterýdi suraǵan.
«Biz tarıfti kóterý úshin ótinim berdik. Usynysymyz qoldaý taýyp, tarıfti kóteremiz degen úmitimiz bar. Óıtkeni, sý tarıfi sońǵy ret 2015 jyly kóterilgen. Sodan beri tarıf kóterilgen joq. Kerisinshe, osy jyldar ishinde monopolııaǵa qarsy vedomstvo bizdiń tarıfimizdi 2 esege jýyq tómendetti», -deıdi «Atyraý oblysy Sý Arnasy» KMK dırektory Arman Kenjeǵalıev.
Onyń aıtýynsha, kásiporynnyń kirisi tek jalaqy, salyqtar, kommýnaldyq qyzmetter jáne basqa da aýdarymdar sekildi aǵymdaǵy shyǵyndardy jabýǵa ǵana jetedi.
«Tutynýshylardy aýyz sýmen úzdiksiz qamtamasyz etýimiz qajet. Bul úshin bizdiń kásiporynnyń sý jetkizetin jelileri men túrli jabdyqtarynda aqaý bolmaǵany jón. Dál qazir bizdegi jeliler men jabdyqtar tozǵan. Ony jedel aýystyrý qajet. Búgingi tómen tarıfpen muny iske asyrý múmkin emes», -deıdi Arman Kenjeǵalıev.
Eske sala ketelik, budan buryn Atyraý oblysyndaǵy 25 avtogaz quıý beketine gaz jetkizilgenin jazǵan edik.
