Atyraýda modýldik ınfektsııalyq aýrýhanaǵa alǵashqy 20 patsıent jatqyzyldy
ATYRAÝ. QazAqparat – Búgin Atyraýda modýldik ınfektsııalyq aýrýhanaǵa alǵashqy 20 patsıent jatqyzyldy, dep habarlaıdy QazAqparat.
Bul aýrýhana byltyr NCOC kompanııasynyń demeýshiligimen eki aıda boı kótergen edi. Qazir jańa nysan №2 ınfektsııalyq aýrýhananyń bólimshesi retinde jumysyn bastady. Oblystyq densaýlyq saqtaý basqarmasynyń basshysy Ashan Baıdýálıevtiń aıtýynsha, 200 oryndyq modýldik tıptegi aýrýhanada 4 blok bar. Aýrýhanada 180 statsıonarlyq tósek jabdyqtalǵan. Al, reanımatsııalyq kereýet pen qarqyndy terapııaǵa 20 tósek arnalǵan.
«Aýrýhana qurylysy ınfektsııalyq baqylaýdyń barlyq talaptaryna saı jasaqtalǵan. Munda dıagnostıka jáne emdeý úshin zamanaýı medıtsınalyq jabdyqtarmen – kompıýterlik tomografııamen, sandyq rentgen, medıtsınalyq gaz júıesimen, ÝDZ, EKG, ókpeni jasandy jeldetý jáne basqa da apparatarmen qamtylǵan. Sondaı-aq, qaýipsizdik deńgeıi joǵary aqyldy jeldetý júıesi ornatylǵan. Ár palatadaǵy tósek-orynnyń janynda medbıkeni shaqyrý túımesi bar. Al, oqshaýlanǵan bokstarǵa arnaıy chıpter arqyly kirýge bolady. Búırek jetkiliksizdigi bar naýqastar úshin gemodıalız jasaý qyzmeti qolǵa alyndy», -deıdi Ashan Baıdýálıev.
Qazir modýldik ınfektsııalyq aýrýhanada koronavırýs ınfektsııasyn juqtyrǵan 20 naýqas em qabyldap jatyr. Al, oblystyq №2 ınfektsııalyq aýrýhanada qaýip vırýsqa shaldyqqan 84 naýqas emdelýde. Onyń ishinde 8 jansaqtaý bóliminde jatyr.
«Naýqastardyń eń úlkeni – 92 jasta, al eń kishisi – 30-da. Olardyń arasynda 3 júkti áıel boldy. Onyń ekeýi jeńildenip, qajetti emin jalǵastyrýda. Buǵan deıin koronavırýspen mektep jasyna deıingi 2 bala aýyryp, emdelip shyqty. Búgin em alyp jatqan patsıentterdiń 20-sy modýldik tıptegi jańa aýrýhanaǵa aýystyryldy. Olar qalǵan emin osy medıtsınalyq nysanda jalǵastyrady» -deıdi oblystyq №2 ınfektsııalyq aýrýhana dırektorynyń emdeý isi jónindegi orynbasary Nadıa Erǵalıeva.
Onyń aıtýynsha, aýrýhanada polımerazalyq tizbekti reaktsııaǵa (PTR) taldaý jasaıtyn ortalyqtandyrylǵan vırýsologııalyq zerthana jumys isteıdi. Munda táýligine 3000 naýqastyń analızin tekserýge múmkindik bar. Jańa aýrýhanada naýqastarǵa 15 dáriger-ınfektsıonıst, reanımatolog qyzmet kórsetedi. Olar – ınfektsııalyq aýrýlardy emdeý úshin aldyn ala tolyq daıyndyq kýrstarynan ótken bilikti dárigerler.
