Atyraýda modýldi tıptegi aýrýhana salynyp jatyr
ATYRAÝ. QazAqparat – Atyraý qalasynda modýldi tıpte salynyp jatqan juqpaly aýrýlar aýrýhanasynyń qurylysy tamyz aıynda bastaldy. Ony qazan aıynda tolyqtaı aıaqtaý kózdelip otyr. Bul týraly oblystyq densaýlyq saqtaý basqarmasynyń baspasóz qyzmeti málim etti, dep habarlaıdy QazAqparat.
Atyraý oblystyq densaýlyq saqtaý basqarmasy basshysynyń orynbasary Ashan Baıdývalıevtiń málimetine súıensek, medıtsınalyq blokta ákimshilik, zerthana, KT men rentgen apparattary, bronhoskopıkalyq qural-jabdyqtar, ÝZI, elektrokardıograftar bolady dep josparlanýda. Jańa aýrýhana jumysyna jergilikti medıtsına qyzmetkerleri qaıta oqytý arqyly tartylady.
«Infektsııalyq aýrýhana standartymen boı kóterip jatqan 200 oryndyq medıtsınalyq nysandy oblys ákimdiginiń tapsyrmasymen, «Nort Kaspıan Opereıtıng Kompanı N.V.» kompanııasynyń tapsyrysymen «BI Industrial» kompanııasy salyp jatyr. Aýrýhana ǵımaraty jyldam qurastyrylatyn qurylys tehnologııasymen modýldi bloktardan turǵyzylýda. Medıtsına qyzmetkerleri men em alýshylardyń qaýipsizdigin qamtamasyz etetin zamanaýı dıagnostıkalyq jáne naýqastardy emdeýge arnalǵan quraldarmen jabdyqtalady. Medıtsınalyq nysanda eki oryndyq 56 palata, úsh oryndyq 16 palata, bir oryndyq 6 jáne eki oryndy 7 bokstar aýlaǵa shyǵatyn arnaıy esigimen salynýda. Sondaı-aq, qarqyndy terapııa bóliminde 20 kerýet, al qabyldaý-dıagnostıkalyq bóliminde bes boks jasaqtalady», - deıdi Ashan Baıdývalıev.
Eske sala ketelik, budan buryn Jylyoı aýdanynda 75 oryndyq aýrýhana salynyp jatqanyn habarlaǵan edik.
