Atyraýda meıramhanadan bılep shyqqan mas jigit kólik júrgizgen
ATYRAÝ. QazAqparat – Atyraýda meıramhanadan bılep shyqqan mas jigit kólik júrgizgen, dep habarlaıdy QazAqparat.
Oblystyq polıtsııa departamenti baspasóz qyzmetiniń aqparatyna súıensek, jedel basqarý ortalyǵynyń qyzmetkerleri 19 aqpanda saǵat 03:20 shamasynda mas jigittiń áýeli meıramhana aldynda bılep, keıin kólik júrgizgenin anyqtalǵan.
«Baǵyttamaǵa sáıkes 10 mınýtta jetken patrýldik polıtseıler Azattyq dańǵylyndaǵy №124 úıdiń tusynda «Toyota Estima» avtokóligin toqtatty. Bul kólik Armenııa Respýblıkasynda tirkelgen. Kólik júrgizýshisi – Qyzylqoǵa aýdanynyń 30 jastaǵy turǵyny. Narkologııalyq saraptamanyń qorytyndysymen júrgizýshiniń ishimdik ishkeni anyqtaldy. Mas kúıde rýlge otyrǵan jigittiń buryn da osyndaı quqyq buzýshylyq úshin kólik júrgizý quqyǵynan aıyrylǵany belgili boldy» - dep habarlady departamenttiń baspasóz qyzmetinen.
Atalǵan azamatqa qatysty QR Qylmystyq Kodeksiniń 346-babymen (Kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn basqarýdy osyndaı adamǵa berý nemese kólik quralyn osyndaı adamnyń basqarýyna jol bergeni úshin) qylmystyq is qozǵaldy. Avtokólik arnaıy turaqqa qoıyldy.
Eske sala ketelik, budan buryn Atyraýda mas kúıde kólik júrgizgen 558 júrgizýshi jazalanǵanyn jazǵan edik.
