Atyraýda meıramhanada tóbeleskender arasynda jas bala men áıel bar

ATYRAÝ. QazAqparat – Atyraýda meıramhanada tóbelesip, polıtsııaǵa jetkizilgen 10 adamnyń arasynda jasóspirim men áıel bar. Quqyq buzýshylardan sýyq qarý tárkilendi, dep habarlaıdy QazAqparat.

Atyraý oblystyq polıtsııa departamentiniń baspasóz qyzmetinen málim etkendeı, oqıǵa 15 qańtar saǵat 05:10 shamasynda bolǵan.

Atyraý qalasyndaǵy Temirhanov kóshesinde ornalasqan meıramhanalardyń birinde bir top adamnyń arasynda janjal týyndap, sońy tóbeleske ulasqan.

Qalalyq polıtsııa basqarmasy patrýldik polıtsııa batalonynyń qyzmetkerleri oqıǵa ornyna jedel jetip, qoǵamdyq orynda adam ólimine soqtyrý múmkin aýyr qylmystyń aldyn aldy.

Polıtsııa qyzmetkerleri janjalǵa baılanysty 10 adamdy ustady.

Onyń ishinde kámelet jasyna tolmaǵan 1 jasóspirim men 1 áıel, 8 er adam bar.

«Qoǵamdyq tártipti buzyp, ózge adamdardyń tynyshtyǵyna nuqsan keltirgen quqyq buzýshylarǵa QR Ákimshilik quqyqbuzýshylyq týraly kodeksiniń 434-babyna sáıkes ákimshilik hattama toltyryldy. Quqyq buzýshylardan sýyq qarý tárkilendi. Іs qujattary jınaqtalyp, Atyraý qalasynyń ákimshilik quqyq buzýshylyqtar jónindegi mamandandyrylǵan sotyna joldandy», -dep habarlady departamenttiń baspasóz qyzmeti.

Eske sala ketelik, budan buryn Atyraýda túngi klýbtyń aldynda tóbelesken qyzdardyń isi sotqa joldanǵanyn habarlaǵan bolatynbyz.

Eki boıjetken túngi saǵat 03:30 shamasynda «Avangard» shaǵyn aýdanyndaǵy túngi klýbtyń aldynda bir-birimen janjaldasyp qalǵan.

Olardyń bul teris áreketin Atyraý qalalyq polıtsııa basqarmasy jedel basqarý ortalyǵynyń ınspektorlary baıqaǵan.

Bir-birimen jaǵa jyrtysqan boıjetkenniń ekeýi 1997 jyly týǵan. Keıin tentek qyzdarǵa QR Ákimshilik quqyq buzý kodeksiniń 434-babynyń 1-bóligimen ákimshilik hattama toltyrylyp, is sotqa joldandy.