Atyraýda meıramhana tońazytqyshynan 73 kg bekire tuqymdas balyq tabyldy
Atyraý, Batys Qazaqstan jáne Mańǵystaý oblystaryndaǵy sý aıdyndarynda «Bekire – 2023» keń aýqymdy balyq qorǵaý aktsııasy ótip jatyr. 1 sáýirde bastalǵan aktsııa 31 mamyrǵa deıin jalǵasady.
Onyń aıasynda Polıtsııa departamentiniń qyzmetkerleri iri kólemde bekire tuqymdas balyq túrlerine qol suǵýshylyq deregin anyqtady.
«Máselen, Atyraý qalasynda ornalasqan meıramhananyń tońazytqyshynan jalpy salmaǵy 73 kelini quraıtyn bekire tuqymdas balyq tabyldy. Al 1995 jyly týǵan júrgizýshiniń avtokóligin tekserý kezinde 121 kelini quraıtyn bekire tuqymdas baǵaly balyq anyqtaldy. Zańsyz aınalymnan tárkilengen baǵaly balyq túrleri «Jaıyq-Atyraý» bekire shabaǵyn ósirý zaýytyna tapsyryldy», - dep habarlady departamenttiń baspasóz qyzmetinen.
Qazir atalǵan derekterge qatysty QR Qylmystyq kodeksiniń 339-baby 1-bóligimen tergep-tekserý bastaldy. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, buǵan deıin bir aıda zańsyz aınalymnan jarty tonnaǵa jýyq bekire tárkilengenin habarlaǵan bolatynbyz.
Jaıyq-Kaspıı oblysaralyq balyq sharýashylyǵy basseındik ınspektsııasynyń ókili Oleg Týshkanovtyń málimetine súıensek, aktsııa bastalǵannan beri 432 quqyq buzýshylyq anyqtalǵan. Osyǵan baılanysty 319 adam ákimshilik jaýapqa tartyldy.
«Balyq qorǵaý zańdylyǵyn buzýshylarǵa jalpy somasy 5,8 mln teńgeniń aıyppuly salyndy. Zańsyz aınalymnan 4 tonna 370 keli balyq alyndy. Onyń ishinde 495,85 keli bekire tuqymdas balyq túrleri, 28 keli bekire tuqymdas balyqtardyń ýyldyryǵy bar. Quqyq buzýshylardan 158 balyq aýlaý quraly, 33 sý kóligi jáne 11 avtomashına tárkilendi», -dep habarlady Oleg Týshkanov.
