Atyraýda meıramhana aldynda tóbelesken áıelder sotta jaýap beredi
ATYRAÝ. QazAqparat –Atyraýda meıramhanadan shyqqan úsh mas áıel tóbeles shyǵarǵan, dep habarlaıdy QazAqparat.
Oblystyq Polıtsııa departamenti baspasóz qyzmetiniń málimetinshe, oqıǵa 23 qańtarda túngi saǵat 03:29 shamasynda bolǵan.
«Atyraý qalasyndaǵy Azattyq kóshesinde ornalasqan «Vivaldi» meıramhanasy aldynda 32, 33 jáne 28 jastaǵy úsh áıel ózara kelise almaı tóbeles shyǵarǵan. Olar sol kúni «Vivaldi» meıramhanasynda kóńil kóterip, ishimdik ishken. Patrýldik polıtsııa qyzmetkerleri quqyq buzýshylardy narkologııalyq saraptamadan ótkizdi. Saraptama nátıjesinde úsh áıeldiń jeńil dárejede mas kúıde bolǵany anyqtaldy. Olarǵa qatysty QR Ákimshilik quqyqbuzýshylyq týraly kodekstiń 434-babymen ákimshilik hattamalar toltyrylyp, sotqa joldandy», - dep habarlady departamenttiń baspasóz qyzmetinen.
Al, keshki saǵat 20:00-den keıin jumysyn jalǵastyryp, karantındik shekteý rejımin saqtamaǵan «Vivaldi» meıramhana-baryna qatysty jınaqtalǵan qujattar sheshim qabyldaý úshin Atyraý qalalyq Sanıtarııalyq-epıdemıologııalyq baqylaý basqarmasyna joldandy.
Eske sala ketelik, budan buryn Atyraýda meıramhanalar men dámhanalardyń jumys ýaqyty qysqarǵan bolatyn.
