Atyraýda metanmen júretin avtobýstar jolǵa shyqty
ATYRAÝ. QazAqparat –Atyraý qalasynda metanmen júretin avtobýstar marshrýtqa shyqty, dep habarlaıdy QazAqparat.
Atyraý qalalyq ákimdigi baspasóz qyzmetiniń málimetinshe, «Aq Jaıyq Avtopark» JShS-niń qarjysyna ekologııalyq turǵydan qorshaǵan ortaǵa las shyǵaryndy shyǵarmaıtyn 160 jańa avtobýs satyp alynǵan.
«Jańa avtobýstardyń qozǵalysyn qamtamasyz etý maqsatynda avtopark aýmaǵynda ońtústikkoreıalyq kompressorlarmen qamtylǵan metan gazyn quıý beketi boı kóterdi. Jańa gaz quıý beketi tolyq avtomattandyrylǵan. Óndirýshi tarap bekettiń qyzmetine 10 jyl kepildik berip otyr. Munda ár avtobýs 15-18 mınýtqa kidiredi. Bir mezgilde qatar turǵan 6 avtobýsqa kógildir otyn quıý múmkindigi bar», - deıdi avtopark dırektory Qýantaı Qalman.
Onyń aıtýynsha, ekologııalyq avtobýstar Atyraý qalasy men qala mańyndaǵy eldi mekender turǵyndaryn 6 baǵytta tasymaldaýdy bastady. Al, bıyl Atyraý qalalyq ákimdigi jolaýshylar tasymalyna jumyldyrylǵan avtobýstar sanyn 140-tan 250-ge deıin kóbeıtýdi josparlap otyr. Bul saptaǵy 220 avtobýs múmkindigi shekteýli azamattardyń qajettilikteri úshin tolyq beıimdelgen.
«Bıyl qala turǵyndaryna qolaıly jaǵdaı jasaý úshin jolaýshylar tasymalyndaǵy 7 baǵytta avtobýstardyń qozǵalys ýaqyty jedeldetildi. Marshrýttardyń júrý baǵytyna ózgerister engizilip, uzartyldy. Qalada buryn qamtylmaı kelgen 3 baǵytqa jańadan avtobýstar shyǵaryldy» -dep habarlady qalalyq ákimdiktiń baspasóz qyzmeti.
Sondaı-aq, avtoparktiń daıyndyq deńgeıine baılanysty jaqynda jańadan 5 marshrýtty iske qosý josparlanyp otyr.
