Atyraýda «Mereıli otbasy» baıqaýynyń úzdikteri anyqtaldy
«Mereıli otbasy» baıqaýyna qatysýǵa óńirde 2016 jyly 87 shańyraq ótinish bildirgen. 2017 jyly bul san 97 boldy, al bıyl 107-ge jetti. Saltanat saraıynda uıymdastyrylǵan shara barysynda eńbekte, sportta, ónerde, shyǵarmashylyq pen ǵylymda jetistikke jetip, baıqaýdyń jeńimpazy atanǵan otbasylardy oblys ákiminiń orynbasary Aıgúl Ájiǵalıeva quttyqtady.
«Elbasynyń tapsyrmasy negizinde qolǵa alynǵan bul baıqaý bes jyldan beri uıymdastyrylýda. Otbasy qundylyqtaryn dáriptep, ony nasıhattaýda mundaı sharanyń máni men mańyzy zor. Mereıli otbasylardy kópshilikke ulyqtaý, keıingi urpaqqa úlgi etý - basty maqsat. Sondyqtan, mártebesi zor bul úrdis aldaǵy ýaqytta da dástúrli jalǵasyn tabady», - dedi Aıgúl Temirtasqyzy.
«Otbasylyq qundylyqtardy nasıhattaýǵa baǵyttalǵan baıqaýdyń oblystyq kezeńine 32 otbasynyń qujaty usynyldy. Qatysýshyardyń arasynda san túrli mamandyq ıeleri bar»,-deıdi oblystyq ishki saıasat basqarmasy basshysynyń orynbasary Zlıha Talasbaeva.
Saıys qorytyndysy boıynsha, úshinshi oryndy Qurmanǵazy aýdanynan Áýez Eljanov, Isataı aýdanynan Ánýarbek Saıdýllın, Maqat aýdanynan Bazarǵalı Jeńisbekterdiń otbasylary ıelendi. Jylyoı aýdanynan Nurdáýlet Haqnazarov, Qyzylqoǵa aýdanynan Salamat Taıashov, Mahambet aýdanynan Nurǵalı Násipqalıdyń otbasylary ekinshi orynnyń tuǵyrynan kórindi.
Sondaı-aq, júldege laıyq dep tanylǵan Inder aýdanyndaǵy Súndet Tasqarın men Atyraý qalasyndaǵy Kárim Baqredınovterdiń otbasylaryna respýblıkalyq baıqaýǵa joldama berildi. Sonymen qatar, osy otbasy músheleri uıymdastyrýshylar taǵaıyndaǵan «Kóktem» shıpajaıyna joldamany da jeńip aldy.
Baıqaý qorytyndysynda úzdik dep tanylǵan Kárim Baqrıdenovtiń otbasy da ónegeli januıalardyń qatarynda. 45 jyl jýrnalıstıka salasynda eńbek etken otaǵasyn atyraýlyqtar qashan da qurmetpen ataıdy. Jubaıy Maıra Jekeeva ekeýiniń shańyraq kótergenderine bıyl 45 jyl toldy. Olar 5 baladan 14 nemere súıip otyr.
Soǵys ardageri Súndet Tasqarın maıdan dalasynan oralǵannan keıin týǵan jerinde basshylyq qyzmetter atqarǵan. Zaıyby Shaıda Beımuhanova ekeýi 5 balany dúnıege ákelgen, búginde bul áýletten taraǵan 7 nemere, 17 jıen, 6 shóbere men 12 jıenshar ár salada tabysty eńbek etip, el ıgiligin eseleýge úles qosyp júr.
Aıta ketken jón, jeńimpaz eki otbasy respýblıkalyq kezeńge usynylyp, komıssııa saraptamasynan soń tek bir otbasy ǵana joldama alatyn bolady.
