Atyraýda mentaldy aýytqýy bar balalar úshin kúndizgi statsıonar ashylady
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetinshe, statsıonarda 30 balaǵa em-dom sharasy júrgiziledi.
«Kúndizgi statsıonar №3 Arnaýly áleýmettik qyzmetter kórsetý ortalyǵynyń bazasynda ashylady. Onda medıtsınalyq-áleýmettik saraptaý komıssııasynyń tizimindegi aýtızm dıagnozy qoıylǵan, tserebraldi sal aýrýyna shaldyqqan, tirek-qımyly buzylǵan balalar tegin em alady. Mamandar ár balamen jeke jumys isteıdi. Ár balaǵa 3 saǵat bólinedi. Olarǵa ázirge 45 kúndik em-dom kýrsyn júrgizýdi josparlap otyrmyz», -deıdi Aazamat Mámbetov.
Qazir №3 Arnaýly áleýmettik qyzmetter kórsetý ortalyǵynyń ortalyq mamandary qaıta daıarlyqtan ótken. Aldaǵy ýaqytta qajettilik týyndaǵan jaǵdaıda qosymsha shtattar ashý qarastyrylmaq.
«Bizdiń ortalyqtyń bir blogyna mentaldy aýytqýy bar balalarǵa arnalǵan kúndizgi túzetý statsıonaryna laıyqtaý úshin kúrdeli jóndeý jumystary júrgizildi. Qazir qajetti qural-jabdyqtar ornatý bastaldy. K.ndizgi statsıonar qyrkúıek aıynda ashylady», -dep habarlady №3 Arnaýly áleýmettik qyzmetter kórsetý ortalyǵynyń basshysy Anar Maratova.
Eske sala ketelik, buǵan deıin Atyraýda múgedektigi bar adamdardy ońaltýǵa arnalǵan 150 oryndyq ortalyq salynatynyn habarlaǵan bolatynbyz.
Oblystyq qurylys basqarmasynyń málimetinshe, jobaǵa sáıkes, ortalyqta saýyqtyrý-júzý basseıni, sport jáne májilis zaldary, tehnıkalyq ǵımarat pen jylyjaı qarastyrylǵan.
Ǵımarattyń birinshi qabatynda dárigerlik bólmeler men ońaltý-jattyǵý zaly, ÝZI kabıneti jáne dárihana ornalasady. Al, ekinshi qabatynda naýqastardy ońaltýǵa arnalǵan medıtsınalyq, áleýmettik jáne psıhologııalyq ońaltý aýmaǵy bolady. Úshinshi qabatta tuz shahtasy, elektr sáýlesimen emdeý, ıngalıator aýmaǵy, fızıologııalyq jáne mehanıkalyq emdeý, sýmen jáne ınemen emdeý sekildi terapııalyq bólmeler bar.
