Atyraýda memorgan basshylary áleýmettik jeli arqyly esep bere bastady

ATYRAÝ. QazAqparat - Atyraýda memlekettik organdardyń basshylary áleýmettik jeliler arqyly esep bere bastady. Memlekettik qyzmetshiler Atyraý oblystyq ákimdiginiń resmı paraqshalary arqyly tikeleı efırge shyǵady, dep habarlaıdy QazAqparat óńirlik kommýnıkatsııalar qyzmetine silteme jasap.

Bul bastama Atyraý oblysynyń ákimi Nurlan Noǵaevtyń tapsyrmasy boıynsha júzege asyp otyr. 1 aqpanda áleýmettik jeli qoldanýshylarynyń saýaldaryna oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Ulyqbek Tinálıev pen qalalyq jumyspen qamtý jáne áleýmettik baǵdarlamalar bólimi basshysy Nurly Habıeva jaýap berdi.

«Atyraý oblysynyń ákimi Nurlan Noǵaevtyń tapsyrmasy boıynsha biz áleýmettik jeliler arqyly jasalyp jatqan jumystar men josparlar týraly aıtamyz. Qazir turǵyndardyń kópshiligi aqparatty áleýmettik jelilerden alatyndyqtan osy úrdisti durys dep oılaımyz. Biz ashyq dıalogqa, jumysymyzdy anyq, adal jasaýǵa qashan da daıynbyz», - deıdi oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Ulyqbek Tinálıev.

Jumyspen qamtý, járdemaqy esepteý, ózin ózi jumyspen qamtyp otyrǵan turǵyndardyń máseleleri talqylanǵan tikeleı efır eki saǵatqa sozyldy. Tikeleı efırdi 5 myńǵa jýyq adam tamashalap, 100-den astam suraq qoıyldy.