Atyraýda memlekettik rámizder kúni toılanyp jatyr

ATYRAÝ. QazAqparat - Atyraýda Qazaqstan Respýblıkasynyń memlekettik rámizderiniń alǵash bekitilgenine 25 jyl tolýyna oraı  merekelik kontsert uıymdastyryldy.

Ortalyq alańda ótken saltanatty sharada oblysqa belgili ánshiler men shyǵarmashylyq ujymdar óner kórsetti. 

Alańǵa oblys ákimi Nurlan Noǵaev arnaıy kelip, aımaq turǵyndaryn merekemen quttyqtady. 

"Elbasy belgilep bergen mejelerge jetýde kók týdyń astyna bir kisideı birigip memlekettiń damý baǵytyn qamtamasyz etý - barshamyzdyń paryzymyz. Bul ortaq maqsattarǵa jetýimizdiń negizi - eldegi tynyshtyq, qoǵamdyq kelisim .  Olaı bolsa, kók týymyz árqashan beıbit aspanda jelbirep, ánuranymyz júrekterge jiger berip, eltańbamyz eldigimizdi aıǵaqtap halqymyzdyń mártebesi óse bersin!", - dedi ol.

Aıta ketelik, 1992 jylǵy maýsymnyń 4-inde táýelsiz Qazaqstannyń memlekettik rámizderi alǵash bekitildi. 2007 jylǵy 4 maýsymda  «Qazaqstan Respýblıkasynyń Memlekettik rámizderi týraly» Konstıtýtsııalyq Zańy qabyldandy. Osy Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni retinde merekelenedi.