Atyraýda memlekettik qyzmetshilerge issapar úshin 27 mln teńge keshiktirilip tólengen

Atyraýda memlekettik qyzmetshilerge issapar úshin 27 mln teńge keshiktirilip tólengen, dep habarlaıdy QazAqparat tilshisi.

Memlekettik qyzmet isteri agenttigi Atyraý oblysy boıynsha departamentiniń basshysy Erlan Ermahanbetovtiń aıtýynsha, issaparlarǵa shyqqan qyzmetkerlerdiń kepildikteri men ótemaqylarynyń, eńbek demalysyn berý kezindegi quqyqtarynyń saqtalýyna taldaý júrgizilgen.

«Taldaýǵa sáıkes issaparǵa jiberýge qatysty 57, eńbek demalystaryn berý boıynsha 143 zań buzýshylyqty anyqtaldy. Máselen, memlekettik qyzmetshiler issaparynyń shyǵyndaryna 27 mln 335 myń 260 teńge kólemindegi qarajat merzimderdi buza otyryp tólengen. Memlekettik qyzmetshilerge táýlikaqylarynyń tıisti somadan 2 ese az mólsherde tólengeni anyqtalyp otyr. Atyraý qalalyq, Jylyoı aýdandyq ákimdikteri men ózge de memlekettik organdar turǵyn úı-jaıdy jaldaý shyǵyna qarjyny artyq tólegeni belgili boldy. Sol sebepten, 685 myń teńge mólsherinde artyq tólengen qarjy memleket bıýdjetine qaıtaryldy», -dep habarlady Erlan Ermahanbetov.

Onyń aıtýynsha, memlekettik qyzmetshiler menshik quqyǵymen tıesili múlikti senimgerlik basqarýǵa berýge tıis.

«Memlekettik qyzmetshiler kásipkerlik qyzmetpen aınalysýǵa, kommertsııalyq uıymdy basqarýǵa qatysýǵa quqyly emes. Memlekettik qyzmetshi ózine zańdy túrde tıesili aqshany, óz menshigindegi, kommertsııalyq uıymdardyń jarǵylyq kapıtalyndaǵy úlesterdi, aktsııalardy jáne paıdalanylýy kirister alýǵa ákeletin ózge de múlikti memlekettik qyzmetti ótkerý ýaqytynda senimgerlik basqarýǵa berýge mindetti. Alaıda, júrgizilgen taldaý qorytyndysymen 5 memlekettik ákimshilik qyzmetshiniń atalǵan zań talabyn buzǵany anyqtaldy», - deıdi Erlan Ermahanbetov.

Eske sala ketelik, budan buryn Almas Kópjanov Atyraý oblysy tsıfrlandyrý jáne arhıvter basqarmasyna basshy bolǵanyn jazǵan edik.