Atyraýda memlekettik qyzmetshiler Jaıyq jaǵalaýyn qoqystan tazartty
Atyraý qalasynda 15 naýryz ben 15 mamyr aralyǵynda turmystyq qaldyqtardy sanıtarlyq tazalaýdyń eki aılyǵy jarııalandy. Osyǵan baılanysty 18 naýryzda oblystyq, qalalyq ákimdiktiń 200-den astam qyzmetkeri senbilikke qatysty.
Senbilikke shyqqandar arasynda oblys ákimi Serik Shápkenov pen Atyraý qalasynyń ákimi Meıirim Qalaýı, ákimniń orynbasarlary men basqarmalardyń basshylary bar. Olar Jaıyq ózeniniń 4 shaqyrymǵa deıingi jaǵalaýynan turmystyq qoqystardy jınady.
Jınalǵan qoqys «Arnaıyavtobaza» JShS-niń kólikterimen arnaıy polıgonǵa tasymaldandy.
«Tabıǵattyń tazalyǵyn saqtaý – barshamyzdyń mindetimiz. Biraq udaıy qorshaǵan ortanyń tazalyǵyna mán bermeımiz. Sol sebepten, ózimiz turatyn qala men aýyldy qoqystan tazartý is-sharalaryna kásiporyndar men kommertsııalyq qurylymdardyń ujymdaryn shaqyramyn. Árbir turǵyn ózi turatyn mekenniń tazalyǵyn saqtaýǵa úlesin qosýy kerek», -dedi Serik Shápkenov.
Oblys ákiminiń aıtýynsha, Atyraýda aqpan aıynda qalyń qar jaýdy. Sol kezde shahardy qardan tazartý jumysy táýlik boıy júrgizildi.
«Osyndaı jumystyń nátıjesinde qala kósheleri men jeke sektordaǵy turǵyn úılerdi sý qaýpi seıildi. Degenmen, Jaıyq ózenine sý kelý jaǵdaıyn baqylaý qajet. Osyǵan baılanysty kórshiles oblystardan alynǵan aqparat pen sınoptıkterdiń derekterin eskerý qajet», -dep málim etti Serik Shápkenov.
Eske sala ketelik, buǵan deıin Atyraý oblysynda 55 qoqys polıgony baryn habarlaǵan bolatynbyz.
Ekologııa jáne tabıǵı resýrstar mınıstri Zúlfııa Súleımenovanyń aıtýynsha, byltyr óńirde ruqsat etilmegen 131 qoqys polıgony anyqtalǵan. Qazir Atyraý oblysynda 55 qoqys polıgony bar. Onyń ishinde 8 polıgon (14,5%) ǵana ekologııalyq jáne sanıtarlyq talaptarǵa sáıkes keledi.