Atyraýda memlekettik kirister departamenti kásipkerge 5,4 mln teńge depozıtin qaıtarmaǵan

ATYRAÝ. QazAqparat – Atyraýda memlekettik kirister departamenti kásipkerge 5,4 mln teńge depozıtin qaıtarýdan bas tartqan, dep habarlaıdy QazAqparat.

Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, jergilikti kásipker bıylǵy aqpanda Qytaıdan kedendik deklaratsııalaý rásiminen ótken taýar satyp alǵan.

Al, salyq organynyń qyzmetkerleri taýardyń quny men barlyq qujattardy odan ári tekserý úshin 5 mln 802 myń 717 teńge mólsherinde depozıt engizý týraly talap bergen. Bul qarjynyń 357 423,42 teńgesi bıýdjetke aýdarylǵan.

«Depozıt engizilgennen keıin memlekettik kirister komıteti basqa qun boıynsha baj jáne qosymsha qun salyǵyn qosymsha tóleý qajettigi týraly sheshim shyǵarǵan. Kásipker kelisip, qaryz somasyn tólep, depozıttiń qalǵan somasyn qaıtarý týraly ótinish joldaǵan. Alaıda, 2 aptadan astam ýaqyt ishinde 5,4 mln teńge depozıtin qaıtara almaǵan. Qazir kásipker jyl saıynǵy korporatıvtik tabys salyǵyn aqsha qarajatynyń jetkiliksizdigine baılanysty tóleı almaı júr. Bul óz kezeginde ósimpuldyń paıda bolýyna jáne tólemniń keshiktirilýine ákelip soqtyrýy múmkin. Osyǵan baılanysty kásipker oblystyq memlekettik kirister departamentindegi laýazymdy tulǵalardyń 5,4 mln teńge depozıtin qaıtarýdan bas tartýyna qatysty júgindi», -dep habarlady departamenttiń baspasóz qyzmeti.

Óńirlik departament tarapynan ýákiletti organǵa joldanǵan usynystan soń depozıtke salynǵan aqshalaı qarajat qaıtaryldy.

Eske sala ketelik, budan buryn Atyraýda qos aýrýhana kásipkerlerge 900 mln teńgeden astam qarjyny tólemeı kelgenin habarlaǵan bolatynbyz.