Atyraýda memleketke 35 mlrd.teńgeden astam zalal keltirgen 34 qylmystyq is tergelýde
ASTANA. 5 jeltoqsan. QazAqparat - Qarjy polıtsııasy agenttiginiń tergeý-jedel tobymen Atyraý oblysy ákimshiliginiń laýazymdy tulǵalary jáne merdigerlik uıymdardyń basshylarymen jasalǵan memleketke jalpy mólsheri 35 mlrd.teńgeden astam zalal keltirgen sybaılas jemqorlyq derekteri boıynsha qozǵalǵan 34 qylmystyq is tergelýde.
Aǵymdaǵy jylǵy 27 qarashada jedel-izdestirý sharalarynyń nátıjesinde Astana qalasynda Quralbaev ustaldy. Ol «Gosekspertıza» respýblıkalyq memlekettik kásiporny bastyǵynyń birinshi orynbasary bola tura, 2010 jyly quny 6,1 mlrd.teńgege joǵarylatylyp kórsetilgen «Atyraý oblysynyń Qyzylqoǵa aýdanyn gazıfıkatsııalaý» jobasynyń jobalyq-smetalyq qujattamasy boıynsha jaǵymdy qorytyndy bergen dep aıyptalýda.
28 qarashada Quralbaevqa bıýdjet qarajatyn urlaýǵa kómektesti degen aıyp taǵylyp, 30 qarashada ol sot sanktsııasymen qamaýǵa alyndy.
Qylmystyq ister tergelýde, ózge aqparat tergeý múddesine baılanysty jarııalanbaıdy, dep habarlaıdy Qarjy polıtsııasynyń baspasóz qyzmeti.
