Atyraýda mektep túlekterine 4 myń bilim granty beriledi

ATYRAÝ. QazAqparat – Atyraý oblysynyń ákimdigi mektep túlekterine joǵary oqý ornynyń 4 myń bilim grantyn bólip otyr. Bul jergilikti kadrlardyń qataryn tolyqtyrý úshin qolǵa alynǵan, dep habarlaıdy QazAqparat.

Oblystyq bilim basqarmasy basshysynyń mindetin atqarýshy Aınagúl Dúısekenovanyń málimetinshe, mektep túlekteri bilim grantymen Nur-Sultan, Almaty, Qostanaı, Pavlodar, Semeı men Óskemen qalalaryndaǵy joǵary oqý oryndarynda oqýǵa múmkindik alady.

Mamandyq túrleri keńinen qamtylǵan.

«Bilim grantyna úmitker bolýǵa mektep pen kolledj túlekteri, sondaı-aq, ótken jyldary mektep bitirgen jastar qatysa alady. Eń basty shart – UBT-dan ótý jáne qajetti ball jınaý. Ulttyq joǵary oqý oryndaryna túsý úshin keminde 70, pedagogıkalyq mamandyqtarǵa 75 ball jınaý qajet. Bizdiń óńirde mektepke deıingi tárbıe pedagogtary, matematıka, fızıka, hımııa, bıologııa, geografııa muǵalimderi jetispeıdi. Talapkerler osy mamandyqtardy tańdaýyna keńes beremin. Konkýrsqa qatysýǵa arnalǵan ótinishte 4 mamandyqqa deıin kórsetýge bolady», -deıdi Aınagúl Dúısekenova.

Onyń aıtýynsha, 3 200 grant tehnıkalyq, onyń ishinde IT, mashına jabdyǵy, aqparattyq qaýipsizdik, munaı jáne gaz sekildi mamandyqtarǵa bólingen.

Granttyń qalǵany pedagogıkalyq mamandyqtarǵa beriledi.

«Bıyl orta mektepti 6 myńǵa jýyq oqýshy bitirdi. Onyń 86%-y UBT tapsyrady. Al, 27-30%-y hımııa-bıologııany tańdap otyr. Sebebi, olar dáriger bolǵysy keledi. Mektep túlekterine 16-17 maýsymda attestat beriledi. Grant ıelenýge irikteý kezinde sabaq úlgerimi jaqsy túlekter basymdyqqa ıe bolady. UBT-dan alǵan ball birdeı bolsa, kópbalaly, múmkindigi shekteýli adamy bar otbasylardan shyqqan balalar birinshi kezekte grantty ıelenedi. Óziniń múgedektigi týraly anyqtamasy barlar da eskeriledi», -deıdi Aınagúl Dúısekenova.

Eske sala ketelik, buǵan deıin Atyraýda oqýshylar jaz boıy qoǵamdyq kólikte tegin júretinin habarlaǵan bolatynbyz.