Atyraýda mektep dırektory týysyn jumysqa qabyldap, ol bir kún de istemeı aılyq alyp otyrǵan
Óńirdegi mektep dırektorlarymen kezdesken departament basshysy Erlan Dosanovtyń aıtýynsha, bilim salasynda sybaılas jemqorlyq táýekeli baıqalady.
Bul sybaılas jemqorlyq táýekelderin syrtqy taldaý jáne sybaılas jemqorlyqqa qarsy júrgizilgen monıtorıng qorytyndysymen anyqtalǵan.
«Bilim berý uıymdarynda keń taralǵan zańsyz áreketterdiń biri – jaqyn týystaryn jumysqa qabyldaý. Máselen, 2018 jyly Maqat aýdandyq bilim bólimine qarasty bir mekteptiń dırektory óziniń, orynbasary men bas býhgalterdiń týystaryn jumysqa qabyldaǵan. Alaıda, bul adamdar is júzinde bir kún de jumys istemegen. Soǵan qaramastan aı saıynǵy jalaqyny alyp otyrǵan. Sondaı-aq, baǵany jasandy kóterý máselesi de bar. Ótken jyldyń maýsym aıynda Atyraý qalasyndaǵy mekteptiń biri jalpy somasy 5 mln teńgege bir rettik 100 myń stakan stakan satyp alý týraly habarlandyrý jarııalady. Stakannyń 1 danasyna 50 teńge baǵa belgilegen. Mundaı staqannyń medıanalyq baǵasy 3,5 teńgeni quraıdy. Osylaısha, atalǵan mektep taýardyń baǵasyn jasandy túrde 4 mln 650 myń teńgege kóterdi», -deıdi Erlan Dosanov.
Osyǵan oraı Maqat aýdanyndaǵy №2 mekteptiń dırektory Rýslan Baımuhashev memlekettik satyp alý protsesin ortalyqtandyrý týraly usynysyn bildirdi.
«Mektep dırektorlary men muǵalimder memlekettik satyp alý protsesin júrgizip, kásibine tán emes fýnktsııamen aınalysady. Sol sebepten bilim salasyndaǵy satyp alýdy ortalyqtandyrý máselesin qarastyrýdy usynyp otyrmyz. Bul bizdi kásibimizge tán emes fýnktsııalardan bosatyp, zań buzýshylyqtarǵa jol bermeýge yqpal eter edi», -deıdi Rýslan Baımuhashev.
Eske sala ketelik, buǵan buryn Atyraý-Inder baǵytyndaǵy bir shaqyrym joldy jóndeýge 487 mln teńge jumsalǵanyn jazǵan bolatynbyz.
