Atyraýda mektep dırektory bıznespen aınalysyp, zańsyz tabys tapqan

ATYRAÝ. QazAqparat - Atyraýda zańsyz bıznes úshin sheneýnikterge 3,8 mln teńge aıyppul salyndy, dep habarlaıdy QazAqparat.

Atyraý oblysy boıynsha sybaılas jemqorlyqqa qarsy qyzmet memlekettik qyzmetshilerdiń kásipkerlik qyzmetpen zańsyz aınalysý faktilerin anyqtaý boıynsha monıtorıngti bastady.

Qoldanystaǵy zańnamaǵa sáıkes Qazaqstanda memlekettik qyzmetkerler kásipkerlik jáne basqa aqyly qyzmetpen aınalysýǵa, sondaı-aq, kommertsııalyq uıymdy basqarýǵa qatysa almaıdy.

Monıtorıng nátıjesinde zańnamalyq tyıymǵa qaramastan ózge de aqyly qyzmetpen aınalysqan memlekettik qyzmetshiler anyqtaldy.

Máselen, qalalyq orta mektebiniń dırektory memlekettik fýnktsııalardy oryndaýǵa ýákilettik berilgen tulǵa bola otyryp, kásipkerlik qyzmetti júzege asyrǵany anyqtaldy.

Nátıjesinde tapqan tabysy 190 000 (bir júz toqsan myń) teńgeni qurady.

Laýazymdy tulǵaǵa 428 820 teńge kóleminde ákimshilik aıyppul salynyp, 190 000 teńge tabysy tárkilendi.

Jalpy alǵanda, jyl basynan beri osyndaı buzýshylyqtar úshin 9 adam ákimshilik jaýapkershilikke tartyldy.

Atalǵan quqyq buzýshylyqtyń aldyn alý maqsatynda oblystyń barlyq memlekettik organnyń personaldy basqarý qyzmetkerlerimen kezdesý uıymdastyryldy.