Atyraýda mas júrgizýshi 20 kúnge qamaldy
ATYRAÝ. QazAqparat – Atyraýda kóligimen jol belgisine soǵylǵan mas júrgizýshi 20 kúnge qamalyp, 7 jylǵa júrgizýshi kýáliginen aıyryldy, dep habarlaıdy QazAqparat.
Oblystyq polıtsııa departamenti baspasóz qyzmetiniń habarlaýynsha, jyl basynan beri mas kúıde kólik basqaryp, usaq jol-kólik oqıǵalaryn jasaǵan 30-dan astam júrgizýshi ákimshilik jaýapkershilikke tartylǵan.
«Jedel basqarý ortalyǵynyń beınebaqylaý qyzmetkerleri 23 tamyzda saǵat 05:40 shamasynda «Mercedes Benz» avtokóliginiń Balyqshy shaǵyn aýdanyndaǵy «Zııash» dúkeniniń tusynda 2,4 jol belgisine soqtyǵysqanyn tirkegen. Oqıǵa ornyna jetken patrýldik polıtsııa qyzmetkerleri kólik júrgizýshisin medıtsınalyq saraptamaǵa apardy. Saraptama qorytyndysymen 29 jastaǵy júrgizýshiniń orta dárejedegi mas ekeni anyqtaldy. Kólik júrgizýshisine qatysty QR Ákimshilik quqyqbuzýshylyq týraly Kodeksiniń 608-babynyń 3-bólimimen (Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, osy baptyń birinshi bóliginde kózdelgen, jábirlenýshiniń densaýlyǵyna qylmystyq jazalanatyn is-áreket belgileri joq zııan keltirýge nemese kólik quraldaryn, júkterdi, jol qurylystary men ózge de qurylystardy ne ózge múlikti búldirýge ákep soqqan áreketter) ákimshilik hattama toltyryldy» -dep habarlady departamenttiń baspasóz qyzmeti.
Sot sheshimimen kólik júrgýshisi 20 táýlikke ákimshilik qamaýǵa alynyp, 7 jylǵa kólik júrgizý quqyǵynan aıyryldy.
Eske sala ketelik, budan buryn Atyraýda mas júrgizýshi kóligimen elektr baǵanasyna soǵylǵanyn habarlaǵan bolatynbyz.
