Atyraýda mas kúıde rýlge otyrǵan 2 áıel júrgizýshi kýáliginen aıyryldy
ATYRAÝ. QazAqparat – Atyraýda mereke kúnderi mas kúıde rýlge otyrǵan eki áıel júrgizýshi kýáliginen aıyryldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, 7-8 naýryzda patrýldik polıtsııa qyzmetkerleri mas kúıde kólik basqarǵan 2 áıel ustalǵan.
«Máselen, 7 naýryzda túngi saǵat 02:30 shamasynda Á.Moldaǵulova kóshesiniń boıynda «Toyota Ipsum» avtokóligi toqtatyldy. Tekseris kezinde atalǵan avtokóliktiń 40 jastaǵy júrgizýshisinen ishimdiktiń ıisi baıqalǵan. Al, 8 naýryzda tańǵy saǵat 05:30 shamasynda Vokzal mańy-5 shaǵyn aýdanynan toqtatylǵan «Toyota Camry» avtokóliginiń júrgizýshisi – 39 jastaǵy áıelden alkogoldik ishimdiktiń ıisi shyqqan» -dep habarlady departamenttiń baspasóz qyzmetinen.
Medıtsınalyq saraptamanyń korytyndysymen eki júrgizýshiniń de jeńil dárejedegi mas ekendigi anyqtalǵan. Mas kúıde kólik basqarǵan júrgizýshilerge qatysty QR Ákimshilik quqyqbuzýshylyq týraly Kodeksiniń 608-babymen ákimshilik hattama toltyrylyp, sot sheshimimen 7 jylǵa júrgizýshi quqyǵynan aıyryldy.
Eske sala ketelik, buǵan deıin Atyraýda meıramhanadan bılep shyqqan mas jigit kólik júrgizgenin jazǵan bolatynbyz.
