Atyraýda mas kúıde kólik júrgizgen sheteldik 15 táýlikke qamaldy
ATYRAÝ. QazAqparat – Atyraýda mas kúıde kólik júrgizgen sheteldik 15 táýlikke qamaldy, dep habarlaıdy QazAqparat.
Patrýldik polıtseıler keshe, 2 jeltoqsanda saǵat 02:30 shamasynda Atyraý qalasyndaǵy Gagarın-Taımanov kósheleriniń qıylysynda «Vaz 2104» avtokóligin toqtatqan.
«Tekserý kezinde kólik júrgizýshisi Ózbekstan Respýblıkasynyń 32 jastaǵy azamatynyń masań kúıde ekeni baıqaldy. Saraptama qorytyndysymen júrgizýshiniń alkogoldik ishimdik ishkeni anyqtaldy. Júrgizýshige qatysty QR Ákimshilik quqyqbuzýshylyq týraly Kodeksiniń 608-babymen (Kólik quralyn alkogoldik masań kúıde basqarýy) ákimshilik hattama toltyryldy. Mamandandyrylǵan ákimshilik sottyń sheshimimen mas kúıde rýlge otyrǵan sheteldik júrgizýshi 7 jylǵa kólik basqarý quqyǵynan aıyrylyp, 15 táýlikke qamaýǵa alyndy» -dep habarlady oblystyq Polıtsııa departamentiniń baspasóz qyzmeti.
Sot qaýlysynda kórsetilgen ákimshilik jazany ótegen soń, sheshim qabyldaý úshin shetel azamatyna qatysty qujattar kóshi-qon polıtsııasy bólimine joldanady.
Eske sala ketelik, budan buryn Atyraýda 2,6 mln teńge aıyppulyn tólemegen júrgizýshi ustalǵan bolatyn.
