Atyraýda mamandandyrylǵan ákimshilik sot ashyldy
ATYRAÝ. QazAqparat - Atyraý oblysynyń mamandandyrylǵan aýdanaralyq ákimshilik soty ashyldy, dep habarlaıdy QazAqparat oblystyq kommýnıkatsııalar qyzmetine silteme jasap.
Mamandandyrylǵan sottyń ashylý rásimine Atyraý oblysynyń ákimi Mahambet Dosmuhambetov pen oblystyq sottyń tóraǵasy Baýyrjan Jumaǵulov, sondaı-aq memlekettik jáne quqyq qorǵaý organdarynyń basshylary, sýdıalar, advokattar men medıatorlar qatysty.
Mahambet Dosmuhambetov Prezıdent Qasym-Jomart Toqaevtyń «Halyq únine qulaq asatyn memleket» tujyrymdamasy aıasynda ákimshilik ádiletti júzege asyrý úshin irgeli jumystar jasalyp jatqanyna toqtaldy. Sonyń sheńberinde osy jyldyń birinshi shildesinen bastap elimizde jańa Ákimshilik rásimdik-protsestik kodeks kúshine enedi. Azamattar men bıznestiń ákimshilik organdarmen daýlaryn sheshý tártibin retteýge baǵyttalǵan kodeks azamattardyń quqyqtaryn qorǵaý sapasyn jańa deńgeıge shyǵarmaq.
«Bul kodeks sottarǵa ǵana emes, barsha memlekettik organdardyń qyzmetine de asa úlken jaýapkershilik júkteıdi. Qarapaıym azamattardyń quqyqtyq saýatynyń artýyna sony serpin beredi. Buny quqyqtyq memleket ornyqtyrý salasyndaǵy eń bir aýqymdy reformalardyń biri dep aıtýǵa bolady», - degen Mahambet Dosmuhambetov jańa sottyń jumysyna sáttilik tiledi.
Sottyń ǵımaratynda qyzmetkerler men keletin azamattarǵa qajetti barlyq jaǵdaı jasalǵan. Tsıfrlandyrýdyń talaptaryna tolyq sáıkes keletin sot zamanaýı tehnıkalyq qurylǵylarmen jabdyqtalǵan.
Prezıdent Jarlyǵymen qurylǵan sot quramynda tóraǵa jáne tórt sýdıa jumys isteıdi.
