Atyraýda Maks Boqaev pen Talǵat Aıanovtyń soty bastaldy
ASTANA. QazAqparat - Búgin №2 Atyraý qalalyq sotynda sýdıa G. Daýleshovanyń tóraǵalyq etýimen Maks Boqaev pen Talǵat Aıanovtyń isi boıynsha sot otyrysy bastaldy.
Sottyń basy daýmen bastaldy
Bıylǵy kóktemde qamaýǵa alynǵan kúdiktilerge Qazaqstan Respýblıkasynyń Qylmystyq kodeksiniń úsh baby boıynsha (atap aıtsaq 174 baptyń 2 tarmaǵy, ıaǵnı, áleýmettik jáne ulttyq alaýyzdyq týǵyzýǵa baǵyttalǵan qasaqana is-áreketter jasaý, azamattardyń ulttyq namysy men qadir-qasıetine til tıgizý; 274 baptyń 4 tarmaǵy, ıaǵnı, qoǵamdyq tártipti buzýǵa qaýip tóndiretin kópe-kórineý jalǵan aqparat taratý; 400 bap, ıaǵnı, zańsyz sherýlerdi uıydastyrý, ótkizý jáne oǵan qatysý) aıyptar taǵylýda.
Sot bastalarda sýdıa G. Daýleshova aýdarmashynyń mindetterin túsindire bastap edi, kúdiktilerdiń qorǵaýshylary aýdarmashynyń eńbek ótilin, mamandyǵyn rastaıtyn dıplomyn surap, onyń biliktiligine kúmán keltirdi. Biraq olardyń bul áreketinen túk shyqpady. Sonymen birge, sotta Maks Boqaev aıyptaý aktisin osydan bir apta buryn alýdan bas tartqanyn sýdıaǵa jetkizdi. Talǵat Aıanovqa da aıyptaý aktisi 2016 jyly 29 qyrkúıeginde tapsyrylǵan. Sotta T. Aıanovtyń qorǵaýshysy Tólepqalı Aıanov isti júrgizýshi sýdıa G. Daýleshovaǵa narazylyq bildirdi. Ol sýdıany is boıynsha aldyn-ala tyńdaý ótkizbeı, sottalýshynyń qorǵalý quqyqtaryna óreskel nuqsan keltirgenin aıtty. Alaıda ol sýdıany qurmetteıtinin aıta kele: «Siz qylmystyq ister júrgizýde mol tájirıbeńiz bar adamsyz»,- dep maqtaý sóz aıtty. Odan keıin sýdıa úzilis jarııalap, keńesetin bólmege shyǵyp ketti.
Tergeýdiń nusqasy boıynsha, shymkenttik kásipker Toqtar Tóleshov óziniń qaramaǵyndaǵy qyzmetkerleri N. Dosanbaev pen O. Bekbaýov arqyly Talǵat Aıanovqa Atyraý qalasynda «jer mıtıngilerin» uıymdastyrý men ótkizý úshin 100 000 AQSh dollaryn jibergen. 2016 jyldyń sáýir aıynda T. Aıanov pen M. Boqaev jer zańnamasyna qoǵamnyń qyzyǵýshylyǵy artqan sátti paıdalanyp, «jer máselesi» boıynsha qarsylyq aktsııalaryn uıymdastyrady. Aıyptalýshylar T. Aıanov pen M. Boqaev turǵyndardy jer taqyrybyna eliktirip, halyqtyń patrıottyq sezimin óz jeke basynyń múddesine paıdalanyp, «Facebook» áleýmettik jelisindegi jeke paraqshalarynda «el basshylyǵy aýyl sharýashylyǵy jerlerin sheteldik azamattar men kompanııalardyń jekemenshigine aınaldyrýdy josparlaýda» degen sıpattaǵy kópe-kórineý jalǵan aqparat taratqan.
Sotqa deıingi tergeý sharalarynan anyqtalǵany, M. Boqaev pen T. Aıanov jer máselesine qatysty arnaıy qurylǵan jer komıssııasynyń otyrysyna qatysýdan bas tartyp, Jer kodeksine engizilgen túzetýlerdi alyp tastaýǵa qarsylyq bildirý úshin jurtty 21 mamyrda qarsylyq aktsııasyna shyǵýǵa shaqyrǵan. Atap aıtarlyǵy, atalǵan sot úderisi ashyq ótip jatyr. Oǵan qyzyǵýshylyq tanytqan barlyq BAQ jáne qoǵam ókilderi qatysýda.
Sot qorǵaýshynyń ótinishin qanaǵattandyrǵan joq
№2 Atyraý qalalyq sotynyń sýdıasy Baqytgúl Dúısebalıeva T. Aıanovtyń qorǵaýshysy Tólepqalı Aıanovtyń sýdıaǵa bildirgen narazylyǵyn qanaǵattandyrǵan joq. Onyń aıtýynsha, qorǵaýshynyń ótinishinde zańdyq negiz bolmaǵan. «Sot G. Daýleshovaǵa isti júrgizýge narazylyq bildirý týraly sottalýshy T. Aıanovtyń qorǵaýshysy T. Aıanovtyń ótinishin qanaǵattandyrǵan joq. Ótinish berýshi keltirgendeı, bul jerde sýdıanyń iske jeke qyzyǵýshylyǵynyń bary anyqtalmady. Osyǵan oraı, Qazaqstan Respýblıkasynyń Qylmystyq-protsessýaldyq kodeksiniń 87 babyn basshylyqqa ala otyryp, qorǵaýshynyń sýdıaǵa narazylyq bildirý týraly ótinishi qanaǵattandyrýǵa jatpaıdy degen qaýly shyǵaryldy. Bul qaýly boıynsha shaǵym túsirýge bolmaıdy»,- dedi sot otyrysynda B. Dúısebalıeva.
Aıta keterligi, Tólepqalı Aıanovtyń ózi sýdıaǵa narazylyq bildire otyryp, onyń biliktiligi men kásibı sheberligine eshqandaı kúmán keltirmeıtinin málimdegen edi.
Tergeýdiń nusqasy boıynsha, kúdiktiler Maks Boqaev pen Talǵat Aıanovqa Qazaqstan Respýblıkasynyń Qylmystyq kodeksiniń úsh baby boıynsha (atap aıtsaq 174 baptyń 2 tarmaǵy, ıaǵnı, áleýmettik jáne ulttyq alaýyzdyq týǵyzýǵa baǵyttalǵan qasaqana is-áreketter jasaý, azamattardyń ulttyq namysy men qadir-qasıetine til tıgizý; 274 baptyń 4 tarmaǵy, ıaǵnı, qoǵamdyq tártipti buzýǵa qaýip tóndiretin kópe-kórineý jalǵan aqparat taratý; 400 bap, ıaǵnı, zańsyz sherýlerdi uıydastyrý, ótkizý jáne oǵan qatysý) aıyptar taǵylýda.
