Atyraýda magıstraldy gaz qubyryn urlaǵan qylmystyq top ustaldy

ATYRAÝ. QazAqparat – Atyraýda ulttyq kompanııanyń magıstraldy gaz qubyryn urlaǵan qylmystyq top ustaldy, dep habarlaıdy QazAqparat tilshisi.

Oblystyq polıtsııa departamentiniń baspasóz qyzmetinen málim etkendeı, qylmystyq top músheleri 21 sáýirde ustalǵan.

«Qylmystyq top Atyraý oblysyndaǵy «Inder-Mahambet» magıstraldy gaz qubyryn urlap kelgen. Prokýratýranyń úılestirýimen uıymdasqan qylmysqa qarsy kúres basqarmasynyń qyzmetkerleri «QazTranGazAımaq» AQ-nyń qoryna iri mólsherde zalal keltirýge baılanysty qylmystyq isterdi tergeý kezinde úsh kúdiktini ustady. Qazir 1978, 1984 jáne 1988 jylǵy kúdiktiler ýaqytsha ustaý ızolıatoryna qamaýǵa alyndy», - dep habarlady departamenttiń baspasóz qyzmeti.

Sotqa deıingi tergep-tekserý QR Qylmystyq kodeksiniń 188-baby 4-bóliginde kózdelgen bótenniń múlkin asa iri mólsherde urlaý deregi boıynsha júrgizilip jatyr.

Ózge aqparat tergeýdiń qupııalyǵyn qamtamasyz etý maqsatynda Qylmystyq-protsestik kodekstiń 201-babyna sáıkes jarııalaýǵa jatpaıdy.

Eske sala ketelik, budan buryn Atyraýda qoımadan ondaǵan jylý batareıasy men eseptegishter urlaǵan kúdiktiler ustalǵanyn jazǵan bolatynbyz. Shahar turǵyny Atyraý qalalyq polıtsııa basqarmasynyń №1 bólimine qoımaǵa ury túskeni týraly shaǵym bergen.

«Polıtsııa qyzmetkerleri atalǵan derekke qatysty jedel izdestirý is-sharasyn ótkizdi. Qoımadan shaǵymdanýshyǵa tıesili 87 dana jylý batareıasy, 15 qorapqa salynǵan 10 dana gaz eseptegishi men 20 dana sý eseptegishi urlanǵanyn anyqtady. Jábirlenýshige keltirilgen materıaldyq shyǵynnyń mólsheri 5 mln 325 myń teńgeni qurady», - dep habarlaǵan edi departamenttiń baspasóz qyzmeti.