Atyraýda qyzylsha juqtyrǵan 6 adam aýrýhanada jatyr
Atyraý oblystyq Sanıtarııalyq-epıdemıologııalyq baqylaý departamentiniń basshysy Mádenıet Tanaýovtyń málimetinshe, 2 naýryzdan 25 sáýirge deıin qyzylsha dertine qatysty 16 jaǵdaı tirkelgen.
«Onyń ishinde 6 jaǵdaı zerthanalyq jolmen rastaldy. Túrkııa men Tájikstannan kelgen eki adam qyzylsha juqtyryp alǵan. Qalǵany Atyraý oblysynyń turǵyndarynan anyqtalyp otyr. Naýqastarmen qarym-qatynasta bolǵan adamdarǵa medıtsınalyq baqylaý ornatyldy», - dep málim etti Mádenıet Tanaýov.
Al oblystyq Densaýlyq saqtaý basqarmasynyń basshysy Qaısar Abdalıevtiń aıtýynsha, qyzylsha aýrýy balalar arasynda kóbeıgen.
«Qyzylsha juqtyrǵandardyń arasynda 18 jasqa deıingi 9 jasóspirim bar. Qazir qyzylsha aýrýyn juqtyrǵan Jańatalap aýylyndaǵy Jambyl atyndaǵy orta mektepte dızenfektsııa jáne jeldetý jumystary kúndelikti júrgizilip jatyr», - dep habarlady Qaısar Abdalıev.
Basqarma basshysynyń aıtýyna qaraǵanda, atalǵan vırýsqa qarsy vaktsınanyń 22 myń dozasy bar.
«Biz turǵyndardy ekpe saldyryp, aýrýdyń aldyn alýǵa shaqyramyz. Óıtkeni, juqpaly aýrýdan vaktsına saldyrý arqyly ǵana qorǵanýǵa bolady. Qyzylshanyń basty belgileri – dene qyzýynyń kóterilýi, jótel, muryn, kóz ben tamaqtyń qabynýy. Al bórtpelerdiń paıda bolýy dıagnozdy tolyq dáleldeıdi. Aýa-tamshy arqyly beriletin bul vırýs balalar arasynda kóp kezdesedi. Qazir 6 naýqas №2 Atyraý oblystyq aýrýhanasynda tıisti emin alyp jatyr», - dep málim etti Qaısar Abdalıev.
Eske sala keteıik, budan buryn Atyraýda qyzylsha tabylǵan mektepte keı synyptar onlaın oqıtynyn jazǵan edik.