Atyraýda qyzmetkerlerdiń syıaqysyn jymqyrǵan polkovnık sheninen aıyrylyp, sottaldy

NUR-SULTAN. QazAqparat – Atyraý oblysynyń mamandandyrylǵan kúzet qyzmeti basqarmasynyń bastyǵy qyzmetkerlerdiń syıaqysyn jymqyrǵany úshin sheninen aıyrylyp, eki jylǵa sottaldy. Bul týraly Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Begaıdarov onlaın brıfıngide málim etti, dep habarlaıdy QazAqparat tilshisi.

Onyń aıtýynsha, 3 shildede qyzmetkerlerdiń syıaqysy men materıaldyq muqtajdyqtaryna dep bólingen qarajatty jymqyrǵan kúzet basqarmasynyń basshylaryna Atyraý qalasynyń № 2 soty úkim shyǵarǵan.

«Atyraý oblysynyń mamandandyrylǵan kúzet qyzmeti basqarmasynyń bastyǵy, polıtsııa polkovnıgi N.Tóleshov, onyń orynbasary Jomartov pen Salahıdenov qyzmetkerlerge syıaqy berýge, materıaldyq kómek kórsetýge bólingen bıýdjet qarajatyn jymqyrdy jáne qyzmetkerlerdi oblys aýdandaryna issaparǵa jiberý shyǵyndary men janarmaı talondaryn qolma-qol aqshaǵa aınaldyrý týraly jalǵan buıryqtarǵa qol qoıdy degen kúdikke ilingen bolatyn», - dedi antıkor ókili.

Agenttik tergeýshsiniń aıtýynsha, sotta kúdiktilerdiń jemqorlyq áreketi dáleldengen. Osylaısha sot úkimimen Atyraý oblysynyń mamandandyrylǵan kúzet qyzmeti basqarmasynyń bastyǵy polıtsııa polkovnıgi N.Tóleshov ómir boıyna memlekettik qyzmette laýazym atqarý quqyǵynan, polıtsııa polkovnıgi ataǵynan aıyryldy. Sondaı-aq ol 2 jylǵa bas bostandyǵyn shekteý jazasyna kesildi.

Onyń orynbasary polıtsııa polkovnıgi N.Jomartov memlekettik qyzmette laýazym atqarý quqyǵynan jáne polıtsııa polkovnıgi ataǵynan aıyrylyp, bas bostandyǵy 2 jylǵa shekteldi.

Sondaı-aq, basqarma ınspektory, polıtsııa aǵa leıtenanty N.Salahıdenov ta memlekettik qyzmette qyzmet atqarý quqyǵynan, polıtsııa aǵa leıtenanty ataǵynan aıyryldy. Sonymen birge 6 mln 703 myń teńge aıyppul tóleıtin boldy.